Cash Assistance Sa Mga Seniors, Ipanghatag Na

Ang ‘tag P2,000 nga balanse ngadto sa matag senior citizen dinhi sa dakbayan sa Sugbo ipanghatag na g’yud ngadto kanila karong sunod semana kon mabalik na si Mayor Michael Rama gikan sa iyang pagbakasyon.

Mao kini ang gibutyag ni City Treasurer Diwa Cuevas kinsa mitug-an nga gihikay na nila ang mga gikinahanglang dukomento alang sa paghatag sa mao nga cash assistance.

Kapin sa 60,000 ka senior citizens ang makapahimulos sa mao nga cash assistance gikan sa kagamhanan sa dakbayan sa Sugbo.

Ang mao nga kantidad maoy molangkob na g’yud sa kinatibuk-an nga P10,000 nga cash assistance nga gisaad sa administrasyon ni Mayor Rama alang sa matag senior citizen sa miaging tuig.

Ang dakbayan sa Sugbo mogasto og dili mominus P120 milyones aron mahatag ang ‘tag P2,000 sa kapin sa 60,000 ka senior citizens sa dakbayan.

Samtang wala pa mahibaw-i kon kanus-a masugdi sa paghatag ang cash assistance sa mga senior citizens para karong tuiga.

Matud ni Cuevas nga magpaabot sila sa kamandoan ni Mayor Rama kon anus-a sugdan sa pag-release ang cash assistance sa mga senior citizen niining tuig 2014.

Gibahibalo na ni Mayor Rama nga matag senior citizens hatagan lang og P6,000 gawas lang kon adunay dakung kantidad nga makolekta ang dakbayan.

Apan si Konsehal Margarita “Margot” Osmeña miingon nga walay rason nga dili ihatag ni Mayor Rama ang gisaad kaniadto nga tag P12,000 nga cash assistance sa mga senior kay wala nila giibanan ang gahin nga P720 milyones.