CITOM, Kapitan, Dili Oyun Pasirad-an ang Dalan Osmeña Blvd Kilid Sto. Niño

Supak ang kadagkoan sa Cebu City Traffic Operations Management (CITOM) ingon man ang mga opisyal sa Barangay Santo Niño nga dili na paagian og mga sakyanan ang Osmeña Boulevard kilid sa simbahan sa Basilica del Santo Niño.

Si CITOM Executive Director Rafael Christopher Yap ug Santo Niño Barangay Kapitan Pancho Ramirez mitunga atul sa public hearing og mipasabot nga dili angay nga sirad-an ang kabahin sa Osmeña Boulevard alang sa mga sakyanan.

Ang ordinansahon nga magdili sa pagpaagi og mga sakyanan kilid sa Basilica gisugyot ni Vice Mayor Edgardo Labella tungod kay adunay nangagpas nga ang kanunay nga pagkurog sa simbahan mugna sa pag-agi sa mga sakyanan maoy nakapalumpag sa kampanaryo atul sa linog.

Usa ka architect miatubang usab sa City Council og mibutyag nga ang asu ug abug nga mugna sa mga sakyanan nakatampo usab sa pagkagabok sa kampanaryo.

Hangtud karon wala pa kasugdi sa pag-ayo ang nahugno nga kampanaryo sa Basilica og wala na usab ablihi ang simbahan gawas lang sa gamay’ng kapilya ni Santo Niño didto sa pikas bahin sa simbahan. Ang kaparian anha na magmisa sa Pilgrim Center.

Matud ni Yap ug Ramirez nga kinahanglang adunay technical study ug assessment sa traffic impact aron masayran kon angay ba nga ipatuman ang mao nga sugyot ni Labella.

Si Labella miingon nga dili siya magsapayan kon dili maaprobahan ang gisugyot niya nga ordinansa kay matud niya ania kita sa demokrasya nga kagamhanan.