Mandaue Fire Marshall Gibalhin sa Bohol

Gihulipan na ang City Fire Marshall sa dakbayan Mandaue nga si Fire Chief Inspector Ronaldo Orbeta sa iyang katungdanan ug gibalhin ngadto sa Bohol isip provincial fire marshall didto.

Si Orbeta, giingong naapektohan sa lahugay nga gipatuman sa mga opisyal sa kabomberohan sa rehiyon 7.

Sa nasayran, si Orbeta maoy nadistino isip city fire marshall sa Mandaue dihang iyang gihulipan usab sa katungdanan ang kanhi fire marshall nga si Fire Chief Inspector Rogelio Bongabong.

Si Fire Chief Inspector Orbeta nga nahinabi sa mga tigbalita, miingon nga gikalipay kaayo niya nga ubos sa iyang pagdumala sa kabomberohan sa dakbayan sa Mandaue, wala kaayoy dagkong alarma sa sunog.

Dugang pa niya nga dako ang iyang pagtuo nga tungod kini sa gipatumnan niyang programa nga “Oplan Paalaala” nga iyang gipanghinaut nga ikapadayon usab sa mosunod nga modumala.

Si Fire Senior Inspector Joel Abarquez nga kanhi City Fire Marshall sa dakbayan sa Naga maoy mihulip kang Orbeta sa katungdanan isip bag-o nga City Fire Marshall sa dakbayan sa Mandaue.