Rama Gusto Makabaton ang Dakbayan og CR Daplin sa Karsada

Gusto ni Mayor Michael Rama nga aduna unta’y mga magpapatigayon nga mohimo og nindot nga mga pansayan sa daplin sa mga karsada sa dakbayan sa Sugbo aron kapahimuslan kini sa katawhan.

Matud ni Mayor Rama nga daku kaayo ang panginahanglan nga magbutang g’yud og mga comfort rooms daplin sa mga karsada kay adunay ordinansa ang dakbayan sa Sugbo nga mosilot sa mga tawo nga masakpang magpataka lang og pangihi sa publiko nga mga dapit.

Si Rama miingon nga ang mga pansayan nga mugnaon kinahanglan nga dali ra nga mabalhin sa lainlaing lugar og dili kini permanente nga tukoron. Sugyot ni Rama nga aron mabalhin-balhin ra kining mao nga mga pansayan, kinahanglang maguyod kini sa mga prime movers.

Nagatoo si Rama nga dili alkanse ang mga magpapatigayon nga motukod og mga pansayan daplin sa kadalanan. Hinoon, bisan og gusto si Mayor Rama niini apan ang mao nga ideya magkinahanglan pa nga aprobahan sa City Council.

Daghan ang nangreklamo kaniadtong Dominggo atul sa pagpahigayon sa Sinulog Grand Parade kay minus ra kaayo ang mga portalets nga gipahimutang sa dakbayan daplin sa carousel route.

Bisan pa sa awhag sa mayor nga ang mga balay-patigayon mopagamit sa ilang mga pansayan apan wala kini tumana sa mga tag-iya og negosyo.

Matud ni Rama nga masulbad kining mao nga problema kon adunay mga magpapatigayon nga mosanong sa iyang awhag.