DPS, Parks and Playground, CESET, Abtik Nanglimpyo Human sa Sinulog Parade

Ang hepe sa Department of Public Services (DPS) nga si Rolly Ardoza mosugyot ni Mayor Michael Rama nga hatagan og ganti ang mga kawani nga abtik nga nanglimpyo sa dakbayan human sa Sinulog Grand Parade.

Matud ni Ardoza nga angayan lang g’yud nga pahalipayan ang mao nga mga kawani gikan sa DPS, Parks and Playground ug sa City Environment Sanitation and Enforcement Team (CESET) nga nagtabangay paglimpyo sa dakbayan sa Sugbo human sa parada.

Ang pangulo sa garbage collection division sa DPS nga si Engr. Roger Legaspi miingon nga anaa ra ni Mayor Rama ang paghukom kon hatagan pa sila og ganti sa dali nga paglimpyo sa dakbayan.

Si Legaspi miingon nga wala pa mosidlak ang adlaw, limpyo na kaayo ang dakbayan sa Sugbo, gawas lang niadtong mga bag-ong basura nga gipagawas na usab sa mga tawo gikan sa ilang kabalayan.

Miingon si Legaspi nga dul-an sa 200 ka tonelada nga mga basura ang ilang natigum gikan sa lainlaing dapit sa dakbayan atul sa kalihukan sa Sinulog kaniadtong Dominggo.

Human g’yud sa pagpahigayon sa Sinulog Grand Parade gipakatap dayon sa lainlaing dapit sa dakbayan ang daghang mga kawani nga nanilhig sa mga sagbot.

Ang nadugayan paglimpyo sa mga street sweepers mao ang dapit sa General Maxilom Avenue ug dalan Juana Osmeña nga adunay nagpahigayon og disco hangtud kaadlawon.

Kapin sa 500 ka kawani ang gigamit sa DPS aron magtinabangay sa paglimpyo sa palibot sa dakbayan.

Sa nanglabay’ng katuigan kanunay’ng hatagan og pahalipay ang mga tawo nga manglimpyo sa dakbayan human sa Sinulog. Mata’g usa kanila gipanghatagan og ta’g usa ka sako nga bugas-humay.

Si Mayor Rama wala mobalibad apan matud pa niya, tan-awon niya kon aduna ba’y kwarta nga magamit sa paghatag og pahalipay sa mga kawani.