CITOM: Dili Magpataka og Parking

Ang kadagkoan sa Cebu City Traffic Operations Management (CITOM) mipahimangno sa mga tag-iya’g sakyanan nga dili magpataka og parking, ilabi na karong panahon sa Sinulog, aron dili i-clamp ang ilang sakyanan.

Sukad sa miaging Lunes, daghan na nga mga sakyanan ang gi-clamp sa mga sakop sa CITOM human kini masakpi nga gapataka lang pag-parking daplin sa mga karsada, ilabi na duol sa Basilica del Santo Niño.

Si Joy Tumulak, operations officer sa CITOM, miingon nga kadtong mga tag-iya sa mga sakyanan nga ma-clamp tungod sa pataka nga pagparking, makabayad og multa nga P500.

Apan bisan pa og makabayad sila sa multa sa pagpataka og parking sa sakyanan, ang ilang mga sakyanan dili gihapon tangtangan sa clamp kon aduna sila’y mga pending nga bayranan.

Gipasabot ni Tumulak nga ang tumong sa paghingos nila pag-clamp sa mga sakyanan nga gipataka pagparking aron mahadlok ang mga tag-iya nga magpasagad lang sa pagparking.

Tambag sa mga sakop sa CITOM nga likayan na lang g’yud ang pagdala’g sakyanan alang niadtong mosimba sa Basilica tungod kay ang hawan sa Plaza Sugbo dili na paparkingan atul sa pagsaulog sa Sinulog.

Daghang mga tawo nga wala na masulod sa Pilgrim Center ug anaa na lang magpahimutang sa Plaza Sugbo tupad sa Magellan’s Cross diin adunay daku nga LED screen nga gipahimutang og makita nila ang pari nga nagmisa didto sa altar.