Opisyales, Kawani sa City Hall Apil sa ‘Drug Test’

Giaprobahan sa mga sakop sa Cebu City Council nga ang tanang mga opisyal ug kawani sa kagamhanan sa dakbayan sa Sugbo gikan sa mayor, bisi mayor ug ngadto sa konsehal, isumiter og drug screening test aron pag-ila kinsa kanila ang mga tiggamitan og gidili nga drugas.

Si Konsehal Richard “Ritchie” Osmeña, nga mao’y chairman sa Committee on Peace and Order sa City Council, misugyot nga ang tanan lang nga kawani sa City Hall ang pakuhaan og drug test.

Apan si Konsehal Alvin Dizon mihimo og laing sugyot nga apilon ang tanang pinili nga opisyal sa pagpa-drug test aron sa pagpakita sa katawhan nga sila mga walay gitagoan sa ilang pagkatawo.

Si Mayor Michael Rama wala makagusto sa lakang ni Konsehal Dizon nga ang tanan g’yud nga kawani sa City Hall ang isumiter og drug test, labaw na nga apilon pa ang mga opisyal.

Apan matud ni Rama nga kon hingpit kini nga ipatuman mapugos siya pagsalmot nga magpa-drug test aron malikayan ang mga pagduda.

Matud ni Rama nga sayon ra mailhan kinsa kadtong mga tiggamitan og gidili nga matang sa drugas kay kini “likoy” kon yabag na manulti, magsiga ug magpuwa ang mata.

Gusto ni Rama nga kung kinsa kadtong kawani sa kagamhanan nga gidungog og mamatikdan nga mogamit og ginadili nga matang sa drugas, mao na ang isumiter og kinalit nga drug testing.