Isyu sa Nepotismo, Gihimakak

Kusganong gipanghimakak sa City Administrator sa syudad sa Talisay nga may nepotism sa City Hall.

Suma pa ni Talisay City Administrator John Yre delos Reyes nga ang pagpili sa iyang amahan nga si Talisay City Mayor Johnny Delos Reyes kaniya nga molingkod sa maong posisyon wala makalapas sa balaod batok sa nepotismo.

Gani iyang gipahibalo nga nakapangayo na sila og opinyon sa Department of Interior and Local Government (DILG) labot sa iyang paglingkod isip city administrator samtang mayor ang iyang amahan.

Iyang gipasabot nga ang DILG walay nakitang kalapasan sa iyang posisyon tungod kay wala may labot ang co-terminus o appointive position nga gidili sa maong balaod sanglit dili man kini permanent position.

Siya nagkanayon nga ang iyang gihuptang posisyon usa sa mga posisyon nga ihatag sa executive officer o mayor ngadto sa mga tawo nga iyang masaligan ug andam nga motuman sa iyang kamanduan.

Dugang pa niini nga wala siyay pagduda nga ang pagtumaw sa maong isyu gikan sa mga kaatbang sa politika sa iyang imahan nga mayor.