Devotee City Abli Na Sugod sa Biyernes

Ang mga opisyal sa dakbayan sa Sugbo nagpaabot nga mga 3,500 ka devotees ni Santo Niño gikan sa lagyo nga mga dapit ang modangop ug moestar sa gitukod nila nga Devotee City duol sa Compania Maritima.

Si Mayor Michael Rama pormal na nga mipahibalo nga sugod karong Biyernes magsugod na pagdawat ang mga tinugyanan sa Devotee City og mga lodgers gikan sa lagyo nga mga dapit.

Ang pagmugna og Devotee City gitumong aron kadtong mga tawo nga gikan sa lagyo nga dapit sa nasud ug walay kwarta nga ikabayad og hotel/lodging houses ingon man walay mga paryente nga kaabtan dinhi, mahimo nga anha moestar.

Gisugdan sa dakbayan sa Sugbo ang pagpahigayon og Devotee City kapin sa napulo ka tuig na ang milabay pinaagi ni Kanhi Konsehal Fe Mantua Ruiz nga maoy nakahuna-huna sa maong proyekto.

Sa miaging tuig 110 lang ka container vans nga gipahuwam sa 2Go Shipping ang gipagamit nga libre sa dakbayan apan karong tuiga gihimo na nga 130 ka vans.

Kini tungod kay sa miaging tuig dul-an sa 3,000 ka tawo, apil ang mga bata, nga miestar sa Devotee City, ug karon gitoohan nga modaghan pa ang mangabot gikan sa lagyo nga mga dapit.

Kadtong gusto nga moestar sa Devotee City sugod karong Biyernes mo-presentar lang sa ilang mga tiket sa barko o kaha tiket sa bus nga ilang gisakyan.