PCAC Chair Midasig: Panalipdi and Katawhan, Banhawon ang ‘Cebu’s Finest’

Ang bag-ong chairman sa Police Coordinating and Advisory Council (PCAC) dinhi sa dakbayan sa Sugbo miawhag sa kapolisan nga moserbisyo gayud aron panalipdan gikan sa mga badlongon ang katawhan og nga likayan nila nga mahimo sila nga “corrupt.”

Ang kadagkoan sa Cebu City Police Office (CCPO) nga gipangulohan ni Senior Superintendent Noli Romana midapit ni Vice Mayor Edgardo Labella isip ilang pinasidunggan nga mamumulong niadtong Lunes atul sa awarding ceremonies sa mga polis nga nakahimo og dalaygong binuhatan.

Ang kalihukan gihimo human sa naandan na nga flag-raising ceremonies sulod sa Camp Sotero Cabahug nga anaa mahimutang ang CCPO.

Matud ni Labella nga ang mga polis swerte kaayo nga sila napilian nga moserbisyo sa katawhan mao nga angay g’yud kini nila nga dili binuangan.

Gikutlo ni Labella ang pulong “Justice” kon hustisya diin gihimoan niya og kahulogan ang matag litra. Matud ni Labella nga angay gayud nga ang mga polis makiangayon kanunay sa ilang mga serbisyo.

Gipasabot ni Labella nga daghan ang nagtoo nga ang mga tawo nga mosulod sa trabaho sa kagamhanan mangilkil gayud sa ilang katungdanan og maoy sagad makahatag og bati nga dungog sa mga public servants.

Si Labella, nga miserbisyo sa kagamhanan sukad pa sa iyang pagka direktor sa Ombudsman, namahayag nga duna g’yuy mga tawo nga molikay nga mabulingan ang ilang pagkatawo tungod lang sa corruption.

Matud ni Labella nga dinhi sa dakbayan nadungog kaayo kaniadto ang gitawag og Cebu’s Finest, kahugpongan sa mga polis nga girespetohan tungod sa ilang maayo nga serbisyo nga wala mag-agad og bugti sa ilang trabaho.

Gidasig ni Labella ang kapolisan nga banhawon nila ang Cebu’s Finest og kon mahimo ila pa kini nga palapdan aron ang kapolisan dinhi sa dakbayan mahimo na nga “Country’s Finest.”

Ang bise mayor miawhag sa kapolisan nga atul niining nagsingabot nga kapistahan ni Santo Niño, maninguha gayud unta sila aron panalipdan ang katawhan gikan sa mga badlongon sa katilingban.