Yuta sa mga Ting, Dili Gihapon Pabayran ni Rama

Dili g’yud gihapon pabayran ni Mayor Michael Rama ang P37 milyones nga kantidad sa yuta nga giingong gipanag-iya ni magpapatigayon Roque Ting nga naapil sa pagmugna sa South Reclamation Project (SRP) kaniadto.

Ang hukom ni Mayor Rama gihimo bisan og ang Court of Appeals mibasura na sa pag-apelar sa dakbayan sa Sugbo sa hukom sa Regional Trial Court (RTC) nga angayan g’yud kini nga mobayad kang Ting.

Gisuportahan sa Court of Appeals ang disisyon sa RTC tungod kay ang magpapatigayon atul sa husay sa kaso nakapresentar og mga titulo sa yuta nga iyang giingon nga naapil sa pagmugna sa SRP.

Ang argumento ni Mayor Rama nga dili gayud angay’ng bayran si Ting tungod kay nagduda siya nganong napatitulohan man ang mao nga yuta nga anaa man kini ilawom sa dagat.

Ang yuta nga giangkon ni Ting nahimutang kini sa baybayon kaniadto nga kon magtaub malapawan sa tubig-dagat samtang adunay gitukod nga bodega ug buwaranan sa mga isda.

Matud ni Ting nga ang mao nga yuta napatitulohan kini dugay na kaayo nga katuigan panahon pa sa iyang mga ginikanan og sa ngadto-ngadto naabot kini sa tubig sa dagat.

Si kanhi Mayor Tomas Osmeña kaniadto miuyon unta sa tanyag ni Ting nga modawat na lang og P9 milyones apan gibabagan kini sa mga sakop sa City Council nga gidumala ni Rama.

Matud ni Rama nga patabangon niya sila si Vice Mayor Edgardo Labella ug Konsehal Jocelyn Pesquera nga mohatag og kasayuran kabahin sa mao nga kaso ngadto sa mga abogado sa dakbayan.

Gusto ni Mayor Rama nga mohimo’g Motion for Reconsideration ang dakbayan sa Sugbo sa hukom sa Court of Appeals ug dili usab imposible nga ipaabot ang mao nga kaso ngadto sa Supreme Court.