Mga Senior Nasagmuyo sa P6,000 nga Cash Assistance

Daghang mga senior citizens sa dakbayan sa Sugbo nasagmuyo sa pagpahibalo ni Mayor Michael Rama nga pakunhoran ang ilang cash assistance karong tuiga ngadto na lang sa P6,000.

Si Mayor Rama mipahibalo nga tag P6,000 na lang ang ihatag nga cash assistance sa matag senior citizen dinhi sa dakbayan sa Sugbo ug dili na kadtong gisaad niya nga P12,000.

Ang rason sa pag-ubos matud ni Rama mao ang wala pag-aprobar sa Cebu City Council sa giduso niya nga budget karong tuiga nga nagkantidad unta og P10.5 bilyones. Ang giaprobahan sa konseho kapin lang sa P5.8 bilyones.

Apan si Konsehal Margarita “Margot” Osmeña nga maoy nangulo sa committee on budget and finance sa Cebu City Council mipasabot nga wala nila giibanan ang gisugyot nga gahin sa mayor nga nagkantidad og P720 milyones para sa cash assistance sa mga senior.

Si kanhi mayor ug kongresista Tomas Osmeña nagtoo nga ang tinuoray’ng rason ni Rama sa pag-iban sa kantidad sa cash assistance para sa senior citizens mao nga ang dakbayan sa Sugbo kuwang g’yud og kwarta.

Matud ni Osmena nga si Rama nagpatuga-tuga pagpasalig nga makahatag og dagku nga cash assistance sa mga senior citizens niadtong panahon sa kampanya apan karong midaug na siya sa eleksyon dili na niya tumanon.

Daghan ang mga senior citizens nga nakurat sa pagkasayud ug nasagmuyo sa maong balita. Dunay ubang mga senior citizens nga naguol apan duna hinoo’y uban nga miingon nga maghuwat ra sila kon pila ang ihatag kanila.

Apan duna g’yuy ubang mga senior citizens nga wala makapugong og miingon nga gilingla ra sila sa mayor.

Si Carlo Dugaduga nga tigpamaba ni Mayor Rama miingon nga samtang P6,000 ang ihatag nga cash assistance ang laing P6,000 ihatag sa mga senior citizens pinaagi sa “ubang mga butang” sama sa libre nga tambal.

Apan si Konsehal Osmeña mitataw nga ang Appropriation Ordinance nga gipirmahan na gani ni Rama kaniadtong Disyembre 27, naglatid g’yud nga ang P720 milyones nga budget alang sa mga senior para kini sa ilang cash assistance.

Ang dakbayan sa Sugbo wala pa gani makahatag sa kinatibuk-an nga P10,000 nga cash assistance sa matag senior citizens para sa miaging tuig.