Kontrata sa Kawani sa PIO, Dili Ma-Renew

Duha ka casual nga photographer sa Public Information Office (PIO) sa kagamhanan sa dakbayan sa Sugbo ang dili na parenyohan sa ilang mga work contract ni Mayor Michael Rama.

Ang rason niini mao nga nasuko kanila si Mayor Rama kay walay bisan usa kanila nga mi-duty aron unta mokuha og hulagway sa mayor sa iyang paghimo’g diskurso atul sa pagsaulog sa ika-117 nga sumad sa pagpatay ni Dr. Jose Rizal kaniadtong Disyiembre 30.

Matud ni Mayor Rama nga nauwaw kaayo siya tungod kay wala g’yuy photographer sa PIO nga mi-cover sa mao nga kalihukan ug ang mikuha kaniya’g hulagway mao na lang ang usa sa iyang mga division heads nga migamit og cellphone.

Wala hinoon motubag si Mayor Rama dihang gisukna kon adunay ba’y posibilidad nga pasayloon ra niya ang duha ka kawani kon mangayo kini’g pasaylo kaniya.

Gitataw sa mayor nga masuko g’yud siya kon atul sa mga mahinungdanong kalihukan dili magtagad ang iyang mga kawani. Bisan gani ang pagsul-ob og T-shirt dili gusto ang mayor.

Matud ni Rama nga kon sama niadtong mao nga kasaulogan kinahanglan nga magsul-ob gayud og barong-tagalog ang mga kawani sa City Hall nga mosalmot niini. Ang stage kinahanglang butangan og mga landscape og uban pa nga mga dayan-dayan.

“Kon bati mosulti ang emcee sa mga kalihukan, masuko ‘sab ko ana,”matud ni Mayor Rama.

Image Credit: www.photographyschoolsonline.net