Mga Paboto, Nasakmit

Duha ka baril nga puno sa lainlaing matang sa mga pabuto nga nasakmit sa mga sakop sa Task Force Pabuto sa City Hall gibasa og tubig ni Mayor Michael Rama.

Ang tumong niini aron dili na kapahimuslan pa sa mga tawo nga magtinguha sa paggamit sa mga pabuto. Wala hinoon motataw si Mayor Rama kon nakontento ba siya sa kalampusang sa Task Force Pabuto nga nakasakmit lang og duha ka baril nga mga rebentador.

Ang maong mga pabuto gisakmit tungod kay nasakpan kini nga gibaligya sa lainlaing dapit sa dakbayan, ilabi na sa Carbon market diin kini gidili sa ordinansa.

Si Mayor Rama mimando ni Arce sa sa sunod tuig kinahanglan nga ang City Hall aktibo na sa kampanya batok sa mga pabuto unom ka buwan sa dili pa ang pasko.

Matud ni Rama nga abli siya kon adunay mosugyot nga idili na sa hingpit ang paggamit og mga rebentador dinhi sa dakbayan, apan nanglantaw hinoon ang mayor nga mahimong mahiubos ang mga Insik.

Ang pagpabuto og mga rebentador wala gayud itugot sa ubang mga dakbayan sa nasud ug lugar, sama sa dakbayan sa Davao diin estrikto kaayo kini nga gipatuman ni Mayor Rodrigo Duterte.

Dinhi sa dakbayan sa Sugbo ang pagpamaligya og mga pabuto gitugot lang didto sa mga baligyaanan sa South Road Properties (SRP) ug ang ordinansa naglatid nga kadtong masakpan nga namaligya gawas sa maong lugar sakmiton sa kagamhanan.