Reklamo sa Seniors sa ‘Kasadya sa SRP’

Ang Kasadya sa SRP padayong gihugopan sa daghang mga tawo matag gabii apan daghang mga tawo nga edad-edaran na ang nangreklamo tungod kay wala sila’y dapit nga adto sila makapahuway sama sa paglingkud.

Laing gireklamo sa mga senior citizens nga nahinabi sa MetroCebuNews mao nga layo kaayo ang pansayan nga magamit gikan sa dapit nga gipahigayon ang mga kalingawan.

Gatusan ka mga tawo ang mag-ambahan sa SRP matag gabii diin adunay lain-laing kalingawan nga gipahigayon. Matud ni Market Administrator Raquel Arce, nga maoy nagdumala sa kalingawan, nga tan-awon nila unsay paagi nga masulbad ang reklamo sa mga seniors.

Ang Mandaue City aduna sa’y kalingawan nga gipasiugdahan sa usa ka pribadong kompaniya apan adunay entrance fee sa mga mosulod og mahal pa ang bayranan sa mga “rides.”

Sa Carnival sa Mandaue, ang mga mosulod pabayron og tag P50 ug tag P75 ang bayad sa mga mosakay og “Tyobibo” ug ubang matag sa mga “rides.” Matud ni Arce nga sa SRP walay entrance fee ug tag P25 ngadto sa P40 lang ang bayad sa mga rides.

Matud ni mayor Michael Rama nga gituyo nila nga ilang gisabot ang tigpasiugda sa mao nga Carnival nga dili mahalon ang bayranan aron nga malingaw ang katawhan.