Mga Hardware nga Mobaligya’g ‘Rugby’, Gipanid-an

Gipanid-an karon sa mga opisyal sa Barangay Ermita kon kinsa kining mga tagdumala og hardwares nga mobaligya og ‘rugby’ ngadto sa mga minor-de-edad nga naila nga mga “rugby boys.”

Matud ni Ermita Barangay Captain Felicisimo “Emok” Rupinta, gipasidan-an na nila ang mga tagdumala sa lain-laing hardwares diha sa ilang barangay nga dili gayud mobaligya’g rugby sa mga bata.

Si Rupinta miingon nga samtang gipasaligan sila sa mga tagdumala og hardwares nga dili na sila mobaligya og rugby ngadto sa mga bata, ilabi na ngadto sa gitawag og mga rugby boys, ila gihapon kini’ng panid-an kon gituman ba gayud ang ilang saad.

Basi sa Presidential Decree 1619, ang mga magpapatigayon nga mobaligya og rugby sa mga batan-on mag-atubang og silot nga multa nga dili molapas sa P4,000 ug pagka priso nga dili molabaw sa upat ka buwan.

Si Mayor Michael Rama miingon nga ang kakuwang og ‘parental guidance’ maoy nakaingon nga daghang mga bata ang nasugamak sa hiwi nga dalan.

Usa ka polis misugilon nga nahingangha siya kay atul nga adunay bata nga ilang nasakpan nga naghingos og rugby nga gisulod og silopin, ang inahan sa bata diha ra diay nagtan-aw sa iyang anak.

Ang inahan miingon nga gitugotan niya ang iyang anak nga mag-rugby kay kon dili magsigi kini’g pangayo og kwarta nga ikapalit og pagkaon.