P20,000 Calamity Assistance sa Matag Kawani, Bout Ihatag ni Rama

Sigurado nga mohugyaw sa kalipay ang kapin sa 4,000 ka mga kawani sa Cebu City Hall kay gusto ni Mayor Michael Rama nga hatagan og tag P20,000 nga Calamity Assistance ang matag usa kanila.

Ang lagda hinoon naglatid nga ang makadawat mao lang kadtong mga permanent ug casual nga mga kawani ug walay labot ang mga “Job Order” nga mga empleyado.

Matud ni City Treasurer Diwa Cuevas nga moabut og P61 milyones ang magasto alang sa “Calamity assistance” sa mga kawani sa City Hall. Gipasabot ni Cuevas nga dunay mga konsehal ang wala makagusto nga tawgon og Calamity Assistance ang salapi nga ihatag sa mga kawani.

Si Mayor Rama miingon nga anaa na sa mga konsehal kon aprobahan ba nila o dili ang gisugyot niya nga kantidad nga maisip usab nga dugang bonus sa mga kawani sa City Hall.

Nasayran nga ang P140 milyones nga Supplemental No. 3 gikuha gikan sa sobra nga kantidad nga gitagana sa sweldo ug allowances sa mga kawani sa City Hall karong tuiga, apan ang dakung bahin sa kantidad kuhaon gikan sa pundo nga gitagana unta sa ubang proyekto nga dili na dayonon.

Aduna usay ubang gastohanan nga kuhaon sa Supplemental Budget No 3 sama sa bayranan sa City Hall ngadto sa mga kanhi kawani nga miretiro na sa ilang serbisyo.

Ang committee on budget and finance nga gipangulohan ni Konsehal Margarita “Margot” Osmeña mohimo pa og pagtoon sa maong dugang budget nga gisugyot sa mayor.

Sa laing bahin, gimando kagahapon ni Mayor Rama nga hatagan og laing tag P2,000 ang matag senior citizen dinhi sa dakbayan karong Disyiembre 20 ug 21. Nagpasabot kini nga mogasto na usab og P120 milyones ang dakbayan sa maong dugang cash assistance sa mga senior.

Wala pa mahibaw-i kon kanus-a ihatag ang nahabiling tag dos mil pesos sa matag senior citizens sa dakbayan. Wala motubag si Rama dihang gisukna sa mga reporters kon ngano nga dili ihurot paghatag ang kinatibuk-an nga P4,000 nga kuwang sa matag senior citizens.

Karong tuiga, tag P10,000 ang gisaad sa mayor nga ihatag sa matag senior citizens dinhi sa dakbayan sa Sugbo.

Samtang malipay ang mga senior citizens nga hatagan na usab og tag P2,000 apan dili pa sigurado nga makadawat ba ang mga Persons with Disabilities (PWD) sa ilang tag P2,000 nga kuwang sa ilang tag P5,000 nga cash assistance karong tuiga.

Ang mga PWD dinhi sa dakbayan nakadawat na og pasiuna nga tag P3,000 sayo niining tuiga.

Sa laing bahin, gimando usab ni Rama nga hatagan ang mga opisyal sa barangay sa ilang additonal honorarium. Basi sa rekord, kuwang pa ang City Hall og tulo ka buwan nga dugang honorarium sa mga opisyal sa barangay.

Ang mga kapitan sa barangay adunay tag P5,000 ang matag buwan isip additional honorarium, tag P3,000 ang konsehal ug tag P2,000 ang mga barangay treasurer ug secretary.

Matud ni City Treasurer Cuevas nga hatagan lang ang mga opisyal sa barangay og bali’g duha ka buwan para sa Oktobre ug Nobyiembre. Wala pay petsa kon kanus-a ang pag-panghatag sa mga honorarium sa mga opisyal sa barangay.