P1.1 Milyones Alang sa ‘Devotee City’, Aprobado Na

Aprobado na sa Cebu City Council ang paggahin og P1.1 milyones alang sa pagpatukod og “Devotee City” kon dapit nga anha temporaryo nga makaestar ang walay kapuy-an nga mga taga lagyo’ng lugar nga moanhi sa Sugbo atul sa pangilin ni Santo Niño.

Walay bisan ug sa mga konsehal nga misupak sa sugyot ni Konsehal Roberto “Bob” Cabarrubias nga maoy gitugyanan ni Mayor Michael Rama sa pagdumala sa pagmugna sa Devotee City.

Sulod sa taud-taud na nga panahon ang dakbayan sa Sugbo nagpasiugda niining Devotee City aron matigum ang mga dumodoong nga walay kaabtan ug dili makaabut pagbayad og lodging houses sa tumong nga dili sila anha lang manghigda sa aseras panahon sa gabii.

Sama sa naandan ang Devotee City, anha gihapon ipahimutang kilid nga bahin sa karaang building sa Compania Maritima ug himoon kini pinaagi sa mga container vans nga ipahuwam sa mga shipping companies.

Sa nanglabay’ng katuigan ang 2Go Shipping maoy mopahuwam og mga container vans apan ang dakbayan sa Sugbo mogasto gihapon pagpalit og mga plywood nga gamiton nga sawog sa mao nga mga vans.

Ang ubang departamento sama sa City Health gitahasan sa pag-atiman sa panglawas sa mga mopuyo sa Devotee City ug ang dakbayan mogahin usab og mga tambal nga magamit ilabi na sa mga bata.

Apan adunay nakabantay nga sa nangagi nga katuigan ang kadaghanan sa mga mipuyo sa Devotee City mao ra ang mga manindahay og kandela nga gikan sa lagyo nga dapit nga anhi maninda sa dakbayan atul sa kapistahan ni Santo Niño.

Aron paglingaw sa mga tawo nga moestar sa Devotee City adunay plano nga hatagan sila og mga kalingawan sama sa Variety Show nga ipahigayon sa mga City Hall drama talents.

(Image Credit: piacebu.wordpress.com)