Monumento ni Andres Bonifacio, Gisubhan Na

Pormal na nga gisubhan sa kagamhanan ning dakbayan pinaagi sa Cultural and Historical Affairs Commission kon CHAC ug National Historical Affairs Commission kon NHCP ang Monumento ug Marker ni Gat Andres Bonifacio sa adlaw’ng Disyembre 3, 2013 Martes didto sa historical nga Plaza Independencia.

Gisugdan ug usa ka Santos nga Misa ang kalihokan nga gipangulohan ni Monsignor Roberto F. Alesna, ang Kura Paruko sa Cebu Metropolitan Cathedral, kinsa atol sa iyang wali mihatag gibug-aton sa usa ka ‘Selfless public service’ ug nagkanayon nga ang pagserbisyo ug paghigugma sa atong isig-kaingon ug sa atong nasod sama sa gibuhat ni Bonifacio, sama ra usab nga atong giserbisyohan ug gihigugma ang Ginoo.

Samtang nangunay mismo silang Hon. Ludovico Badoy, ang executive director sa NHCP, Cebu City Mayor Michael Lopez Rama, Bise Mayor Edgardo Labella, ug uban pang mga kadagkuan ning dakbayan diha sa historical nga pag-abli sa tabon sa Monumento ug Marker ni Gat. Bonifacio.

Gitataw ni Badoy nga napili nila ang Cebu City alang sa Visayas ug Davao City sa Mindanao alang sa dungan nga pagpahigayon sa susamang kalihokan, ug nga ang Plaza Independencia usa ka historical nga lugar ug angayan gyod nga anhi ibutang ang proyekto nga gihulma sa Sculptor nga si Juan Sajid Imao.

Subay sa temang, “Dangal at Kabayanihan” gisaulog sa tibuok nasod sa Pilipinas ang ika 150th nga kasumaran sa pagkatawo ni Gat Bonifacio niadtong Nobiyembre 30, 2013. Si Bonifacio (Nobiyembre 30, 1863 – Mayo 10, 1897) ang giilang Amahan sa Katipunan ug Amahan sa Rebolusyon batok sa mga Katsila.

Human gisubhan ang proyekto gisunod dayon ang pinirmahay sa ‘Certificate of Transfer’ niini tali sa NHCP ug Dakbayan sa Sugbo nga nagpamatuod nga pormal na nga gipanag-iya sa naulahi ang naasoy nga Monumento ug Marker.

Gikalipay usab ni Mayor Rama ang kalampusan sa kalihokan ug gipadayag niini nga adunay tinuig nga selebrasyon pahinungod kang Gat. Bonifacio nga ipahigayon atubangan sa Monumento ug Marker niini.

Gipadayag sa Mayor nga, “Let this be a milestone again for Cebu City and bear that there are people who died and believe that our country can be great like Bonifacio who fought for our honor, independence and democracy for a better Philippines,” ug dugang gipasabot niini nga sama sa gisulti ni Badoy ug wali ni Monsignor Alesna, “If you serve your fellowmen and your country just like Bonifacio, then you are also serving God., a service to humanity above self.”

(Ni: Greggy Jiggs P. Senados, PIO Staff, with press release)