Rama Dili Mopasalig nga Mo-abag sa Gastohan sa CNU

Wala mopasalig si Mayor Michael Rama nga abagahon sa dakbayan sa Sugbo ang tanang gastohan sa pagpaayo sa naguba nga school buildings sa Cebu Normal University (CNU) tungod sa miaging linog.

Matud ni Mayor Rama samtang daku kaayo ang iyang tinguha nga katabangan ang CNU apan ang dakbayan sa Sugbo daghan pa usab og mga problema nga angay’ng unahon sa pagtagad.

Si Rama miingon nga ang CNU angay’ng mangayo usab og panabang sa nasudnong kagamhanan sanglit usa man kini ka “state university.”

Ang presidente sa CNU nga si Marcelo Lopez misuwat ni Vice Mayor Edgardo Labella og nangayo og tabang nga abagahon unta sa City Hall ang P19.7 Milyones nga pagpaayo sa ilang school buildings.

Ang mga konsehal nga midiskutir sa maong suwat nga nadawat ni Labella mihukom nga iduso kini sa opisina sa mayor aron kahatagan og diha-diha nga pagtagad.

Sa laing bahin, ang mga bakwit nga sa pagka karon anaa giatiman sa evacuation center sa Barangay Guadalupe nagpasalamat kaayo ni Konsehal Margarita “Margot” Osmeña sa makanunayon niini nga pag-atiman kanila.

Si Abeth Cuizon nga maoy Executive Assistant ni Konsehal Osmeña miingon nga kanunay’ng bisitahan ni Margot ang mga bakwit sanglit giisip niya nga iyang mga sinagop ang maong mga bakwit.

Ang mga bakwit gipanghatagan ni Margot og ilang kagamitan, ilabi na ang mga babaye nga magamit nila pag-atiman sa ilang kaugalingon.