Walay Pagsaka sa Presyo sa Construction Materials

Ang mga suppliers ug construction materials dinhi sa Sugbo mipasalig kagahapon nga dili sila moabuso pinaagi sa pagpamahal sa presyo sa ilang mga baligya aron pahimuslan ang mga biktima sa bagyo.

Ang ilang pasalig gihimo atubangan ni Vice Mayor Edgardo Labella nga mipatawag og tigum sa mga representante og hardware ingon man sa mga tighimo og mga sin, kabilya, lansang ug ubang construction materials.

Si Edna Tan, representante sa Joyland Industrial Corporation nga nahimutang sa Barangay Opao, Mandaue miingon nga wala gayo’y rason nga ang mga retailers og construction materials mopasaka sa presyo sa ilang baligya.

Matud ni Tan nga sila nga mga suppliers wala mopamahal sa presyo sa ilang baligya nga gikompra sa mga retailers og construction materials mao nga dili usab sila angay’ng mopamahal sa kantidad.

Nasayran nga adunay mga retailers og mga construction materials nga mipasaka sa presyo sa ilang mga baligya og mipatoo nga misaka usab ang kantidad didto sa ilang komprahanan.

Matud ni Labella nga unta ang mga magpapatigayon molikay lang unta sa pag-abuso nga maisip nga giduot pagsamot ang mga biktima sa bagyo kang kansang panimalay naguba.

Sa laing bahin giplano usab ni Labella nga pakigtagboan niya ang mga tigbaligya og bugas-humay kay pagka karon grabe ang pagsaka sa presyo ilabi na ang Ganador Rice nga gibaligya na sa P51 ngadto sa P52 ang matag kilo.

(Image Credit: gthint.com)