Labella Bout Pasirad-an ang Dalan’ng Osmeña Blvd. sa Sto. Niño

Dili ipamugos ni Vice Mayor Edgardo Labella ngadto sa kaubanan niya sa Cebu City Council ang pag-aprobar sa gisugyot niya nga ordinansahon nga patak-opan na sa hingpit ang Dalan Osmeña Boulevard diin anaa mahimutang kilid sa Basilica Minore del Sto. Niño.

Gipasabot ni Labella nga gidala niya ang maong isyu sa konseho tungod kay adunay mihimo niining mao nga sugyot sanglit gitoohan nga ang kanunay’ng pag-agi sa mga sakyanan kilid sa simbahan maoy nakapahuyang sa kampanaryo.

Ang kampanaryo sa Basilica nahugno dihang ang 7.2 Magnitude nga linog miigo sa Sugbo ug Bohol kaniadtong Oktobre 15.

Ang gisugyot nga ordinansahon ni Labella giduso na niya sa City Council ug gitugyan na sa Committee on Laws aron kahimoan og dugang pagtoon.

Si Labella miingon nga andam siya nga motuman kon unsa ang kabubut-on sa kadaghanang konsehal tungod kay mao kini ang gilatid sa usa ka demokrasya nga kagamhanan.

Giangkon ni Labella nga kon mahinayon nga sirad-an na sa hingpit ang bahin sa Osmeña Boulevard kilid sa simbahan, angay’ng hawanan ang Legaspi Street aron molapad ang kaagian sa mga sakyanan.

Pagka karon, ang kilid nga bahin sa Legaspi Street habig sa simbahan sa Cathedral ginegosyo sa City Hall pinaagi sa paghimo og pay-parking, unya ang atubangan sa Santo Niño Barangay Hall dunay magparking nga sakyanan ug mga tindera nga anaa na maninda sa karsada.

 (Image Credit: www.scmp.com)