USAID Nakisusi sa Sugbo

Ang United States Agency for International Development (USAID) nagpadala og ilang consultant dinhi sa Sugbo aron makisayod giunsa sa dakbayan ang pagpadali sa pag-isyu sa permit sa pagtukod og mga building ingon man ang occupancy permit.

Matud ni City Engineer Kenneth Carmelita Enriquez nga maoy nagdumala karon sa Office of the Building Officials (OBO) nga gusto sa mga opisyal sa USAID nga ang maayong pamaagi pagpadali sa pag-isyu og permits mapatuman usab sa ubang dapit sa nasud.

Ang consultant sa USAID dinhi sa Pilipinas nga si Sonny Ducay mipasabot nga kun paspas ang pag-isyu og mga onstruction permits ug occupancy permits makapadasig kini og daghang investors nga mamatigayon sa ubang lugar.

Si Enriquez mipasabot nga ang USAID gusto nga mohimo sa dakbayan sa Sugbo nga kakuhaan og pagtulon-an tungod kay bag-ohay pa lang kini nga napasidunggan tungod sa iyang maayo nga programa.

Ang OBO sa dakbayan sa Sugbo adunay gipatuman karon nga pamaagi nga ang usa ka tawo nga moaplay og construction permit ug occupancy permit dili na kinahanglang magbalik-balik pa sa opisina aron magpakisayud kun unsa na ang kalamboan sa ilang papeles.

Matud ni Enriquez nga pinaagi lang sa pag-text sa numero sa OBO mahibaw-an dayon ang kalamboan sa gisumiter nga dokumento.

Sa samang higayon kadtong mga kawani nga hingtungdan maglikay na nga malangan ang mga dokumento diha kanila kay mahibaw-an na kun kanus-a nga anaa kanila ang papeles ug kun ngano nga wala pa nila kini atimana.

Nasayran nga kaniadto dunay pamaagi ang ubang kurakot nga kawani nga tuyoon sa paglangay ang pag-asikaso sa dokumento aron mapugos ang hingtungdan nga mohatag kini’g suborno.

(Image Credit: www.thecommentfactory.com)