Interpol Mibisita sa City Hall

Walo ka sakop sa International Police (Interpol) ang miabut na sa Pilipinas aron sa pagsuta kon unsay ilang matabang, ilabi na ang isyu kabahin sa pag-ila sa mga patay’ng lawas nga wala dayon mailhi hangtud nga gidungan na lang sila paglubong.

Ang team nga gipangulohan ni Michael O’Connel, director for operations sa Interpol sa tibook kalibutan, mibisita sa opisina ni Mayor Michael Rama sa City Hall.

Sila giubanan nila ni Koronel Frank Dalawampu, regional director sa Center for Transnational Crime/Interpol sa Pilipinas ug ni Cebu City police director Noli Romanana.

Matud ni O’Connel nga ang ang iyang team moadto sa Tacloban sa adlawa’ng Biyernis og mohimo’g assessment aron maoy basihan sa ilang rekomendasyon sa labaw’ng opisyal sa Interpol.

Si O’Connel miingon nga kon gikinahanglan, mamahimong mohatag ang Interpol og logistical support sa Pilipinas aron gamiton sa pag-ila sa mga patay’ng lawas nga nagpabiling wala pa mailhi.

Ang kadagkoan sa Department of Health (DOH) mihatag og pagtugot nga ang mga wala pa hiilhi nga lawas sa mga biktima sa bagyong Yolanda malubong temporaryo aron dili makahatag og kadaut sa panglawas sa katawhan.

Napugos ang mga opisyal sa kagamhanan paglubong sa daghang mga patay’ng lawas bisan og wala kini mailhi kay anam-anam na nga nangadugta ang maong mga lawas.

(Image Credit: www.my-badges.com)