Pag-Bakwi sa Ordinansa No.2332, Gipugngan ni Tomas

Si kanhi Kongresista Tomas R. Osmeña miawhag sa mga konsehal sa dakbayan sa Sugbo nga dili g’yud uyonan ang tinguha sa mga alyado ni Mayor Michael Rama nga i-repeal ang ordinansa nga nagpugong sa mayor pagratsada’g baligya sa kayutaan sa South Road Properties.

Si Osmeña miatubang sa konseho atul sa pagpahigayon sa public hearing kabahin sa ordinansa nga gisugyot nila ni Konsehal Dave Tumulak ug Mary Ann delos Santos nga magpa-repeal sa City Ordinance 2332 nga nagdili sa mayor nga makabaligya sa SRP nga walay pagtugot sa konseho.

Matud ni Osmeña nga mabutang sa alkanse ang dakbayan sa Sugbo kon iratsada pagbaligya ang kayutaan sa SRP apan dili kini dayon i-develop sa makapalit aron huwaton nga mosaka pag-ayo ang iyang kantidad.

Gihimong sanglitanan ni Osmeña ang sitwasyon sa kanhi Club Filipino nga karon mao na ang Cebu Business Park nga gibaligya sa probinsya sa Sugbo kaniadto sa tag P1,000 sa matag metro kwadrado, apan karon ang kantidad sa maong yuta miabot na og tag P60,000.

Si Osmeña, nga maoy naninguha nga mamugna ang SRP gikan sa huwam nga kwarta gikan sa Japan, namahayag nga dili imposible nga daghang mga magpapatigayon ang mopalit sa yuta diha sa SRP kon ibaligya kini karon sa mga opisyal sa dakbayan.

Gipasabot ni Osmeña nga ang makapalit sa maong kayutaan karon nga barato pa ang presyo hayan dili lang mogamit niini kay maghuwat nga ang kantidad sama sa gihimo sa mga nakapalit og kayutaan diha sa North Reclamation Area (NRA) nga hangtud karon wala pa gayud nila tukori og mga balay-patigayon ug mga building.

Si Osmeña mipasabot nga ang City Ordinance 2332 wala gayud magdili sa mayor nga makabaligya og yuta sa SRP apan kinahanglang ipaagi kini sa gitawag og “Unsolicited Proposal” aron katun-an sa mga opisyal kon unsaon nila ang yuta nga buot nila paliton.

Gisugyot ni Osmeña nga ang kayutaan sa SRP unya ra unta ibaligya kon mahuman na ang mga proyekto nga gisugdan na pagtukod sa Filinvest Land Incorporated ug sa SM Prime Holdings Incorporated aron nga mosaka na pag-ayo ang kantidad sa kayutaan.

Matud ni Osmeña nga kon mahal na unya kaayo ang kantidad sa kayutaan sa SRP magamit kini paghatag og libre na gayud nga edukasyon sa mga anak sa mga kabus nga taga dakbayan sa Sugbo.

Ang argumento ni Mayor Michael Rama mao nga ibaligya sa dakbayan ang kayutaan sa SRP aron nga kapahimuslan na kini sa katawhan bugti sa dakung utang nga gipas-an karon sa dakbayan.

Ang economic czar ni Mayor Rama nga si Atty. Jose Daluz III mipasabot nga bisan og dili kaayo daku ang kantidad nga makuha sa dakbayan gikan sa halin sa kayutaan sa SRP apan ang dakbayan makakolekta og dakung buhis matag tuig gikan sa makapalit niini.

Matud ni Daluz nga kon mahalin na ang kayutaan sa SRP ang tag-iya mobayad na og real property tax samtang ang mga tag-iya sa business establishments magbayad na usab og business tax.

Dugang ni Daluz nga kon mangahalin na ang kayutaan sa SRP, makamugna kini og daghang trabaho ug makasulbad sa unemployment problem sa dakbayan.

Ang mga konsehal, ilabi na ang mga kaalyado sa Bando Osmeña Pundok-Kauswagan (BOPK), naminaw pag-ayo dihang si Osmeña namulong atul sa public hearing apan wala pa sila mohatag kon unsay ilang baruganan sa isyu.

Daghan hinoon ang nagduda nga ang 13 ka konsehal nga alyado sa BOPK mobasura gayud sa tinguha nga pagpa-repeal sa City Ordinance 2332.