Budget sa Christmas Party, Igahin Alang sa mga Biktima sa Bagyo’ng Yolanda

Adunay sugyot nga ang mga usa ka milyon ka pesos nga budget para sa pagkaon sa tanang kawani sa City hall alang sa ilang sports activities ug Christmas party gastohon na lang sa pagtabang sa mga biktima sa bagyo’ng Yolanda.

Si Atty. Dominic Diño nga maoy hepe sa Human Resource Development Office (HRDO) sa City Hall gitahasan karon nga mopasabot sa mga kawani pinaagi sa ilang mga department heads sa tumong sa mga opisyal.

Matud ni Diño nga ang matag kawani adunay gahin nga tag P250 alang sa meal allowance sa sports activities ug laing P250 nga meal budget sa Chirstmas party karong Disyiembre.

Gitataw ni Diñ0 nga kon dunay mga kawani nga supak nga ang ilang budget sa pagkaon ihatag sa mga biktima sa bagyong Yolanda, ang paghatag og donasyon sa mga kawani sa City Hall himoon na lang nga bulontaryo.

Si kanhi konsehal Joey Daluz III nga sinaligan karon sa mayor mitataw nga kay ang City Hall duna may mga 5,000 ka kawani daku unta kaayo ang ilang matigum nga pundo nga itabang sa mga biktima sa katalagman.

Si Mayor Michael Rama nga nakaadto sa Ormoc niadtong milabay’ng Sabado mitataw nga makalolooy kaayo tan-awon ang maong siyudad diin daghan nga mga balay ang wala nay mga atup.

Matud ni Rama nga adunay usa niya ka kliyente nga tagdumala og dakung kompaniya sa Japan midonar og usa ka milyon ka pesos ingon man si Ambassador Frank Benedicto, nga midonar usab og P250,000 para sa mga biktima sa bagyo.

Gitataw ni Rama nga siya maoy gipagbut-an kon unsaon paggasto ang mao nga salapi mao nga nahukman niya nga ipalit kini og daghang mga tulda nga ihatag sa mga pamilya nga guba ang kabalayan.