Bagyong Yolanda Gipangandaman sa Lokal nga Kagamhanan

Wala’y klase sugod karong adlawa sa Huwebes sa tanang mga tunghaan dinhi sa dakbayan ug kalungsuran sa Sugbo tungod kay gipaabot nga mosugod na pag-igo sa Kabisay-an ang Super Typhoon Yolanda.

Ang pagsuspenso sa klase sa tanang level gimando nila ni Cebu Governor Hilario Davide Jr. ug Mayor Michael Rama human ang kadagkoan sa government’s weather bureau misugyot nga angay na nga mangandam ang mga tawo sa kusog kaayo nga bagyo.

Si Oscar Tabada, ang pangulo sa Philippine Atmospheric Geophysical and Astronomical Services Administration (PAG-ASA), miingon nga ang bagyo nga Yolanda nga giila sa ngalan nga Hainan didto sa laing nasud, adunay hangin nga may gikusgon nga 150 ngadto sa 200 kilometros matag takna.

Si City Schools Superintendent Rhea Mar Angtud mihatag na og pahibalo ngadto sa mga maestra sa lainlaing tunghaan.

Gitigum ni Mayor Rama ang tanang department head sa City Hall og mata’g usa kanila gihatagan og mga tahas nga ilang pagahimoon kon masinati na sa dakbayan ang kusog nga bagyo aron matabangan ang publiko.

Mga heavy equipment sa dakbayan sa Sugbo gipapreparar na daan ni Mayor Rama aron magamit dayon kon gikinahanglan kini panahon nga adunay landslide sa mga karsada sa kabukiran.

Si Tabada miingon nga ang hangin nga pagka karon may gikusgon nga moabut sa 200 kilometros matag takna gipaabot nga mokusog pa tungod sa kainit sa tubig sa dagat.

Basi sa pagbana-bana ni Tabada nga ang bagyo nga Yolanda mosulod na sa Philippine Area of Responsibility (PAR) kon amihanang bahin sa Mindanao ugma sa buntag apan ang pag-uwan masinati pagsugod karong hapon.

Ang nabalak-an sa mayor kay dungan sa pag-igo sa bagyo lawom usab tubig sa dagat nga moabut og hapit duha ka metros dapit sa baybayon sa adlawng Huwebes ug byernes.

Gimando usab ni Mayor Rama nga kadtong mga pamilya nga nagpuyo sa daplin sa Mahiga Creek pabalhinon sa luwas nga mga dapit.

Sa laing bahin gihangyo sa mayor ang mga tagdumala og pribadong kompaniya nga dili lang nila estriktohon ang ilang mga kawani kon mopalta sa ilang mga trabaho karon ug ugma aron mangandam pagpalig-on sa ilang panimalay.