‘City Hall in Taptap’, Gilusad ni Rama

Gilusad personal ni Mayor Michael Rama didto sa Barangay Taptap, bukiran nga bahin sa dakbayan sa Sugbo, ang gitawag niya og City Hall in Taptap.

Ang usa ka building nga iya sa Cremdec kon City Resource Management Development Center maoy gigamit isip City Hall in Taptap diin adto ang mga kawani magbasi.

Gipasabot ni Rama nga ang pagbutang niya sa City Hall in Taptap gitumong aron kadtong mga taga barangay sa kabukirang bahin sa dakbayan nga adunay tuyo sa City Hall, dili na maghago paglugsong sa downtown area.

Ang City Hall in Taptap distinohan og mga kawani sa lainlaing departamento sa kagamhanan sa dakbayan aron maoy moatiman sa panginahanglan sa mga taga bukid.

Ang mga dukomento og mga reklamo nga madawat sa mga kawani nga gidistino sa City Hall in Taptap dad-on nila sa main office sa mao nga mga departamento.

Matud ni Rama nga pinaagi niining iyang proyekto makadaginot ang mga lumulopyo sa bukid og dili na maghago ingon man makagasto sa dagko nga pletehan paglugsong sa dakbayan ug pagbalik sa ilang barangay.

Si Mayor Rama mitagana unta og kapin sa usa ka milyon ka pesos alang sa pagmugna og City Hall Extention building sa Barangay Taptap sa Budget karong tuiga, apan wala kini aprobahi sa konseho tungod kay nagtoo sila nga dili makakuha’g budget si Rama sa maong proyekto.

Karong tuiga, ang konseho miaprobar laing og P5.2 Bilyones sa kinatibuk-ang P6.7 Bilyones nga budget nga giduso ni Rama. Hangtud sa miaging Septiembre 30, ang kinatibuk-ang nakolekta nga buhis ug ubang revenues sa dakbayan miabut pa lang og P3.9 Bilyones.

Ang mayor misugyot na usab og P10.4 Bilyones nga budget para sa tuig 2014 apan gi-review pa kini sa Committee on Budget and Finance sa konseho.