Mga Hukmanan Temporaryong Ibalhin

Si Mayor Michael Rama misugyot ngadto sa kadagkoan sa hukmanan dinhi sa Sugbo nga anha sila maghimo og temporaryo nga court rooms sa karaang building sa Cebu Eastern College diha sa dalan D. Jakosalem.

Si Regional Trial Court (RTC) Executive Judge Soliver Peras nakigtagbo ni Mayor Rama og mitug-an nga nagpangita sila karon og laing dapit nga adto sila makapahigayon paghusay sa mga kaso.

Ang Palace of Justice building luyo sa Kapitolyo nakasinati og pagpangliki resulta sa kusog nga linog nga miigo sa Sugbo kaniadtong Martes sa miaging semana mao nga naparalisar ang paghusay sa mga kaso sa hukmanan.

Si Rama mikontak ni manlalaban Agusto W. Go, tag-iya sa University of Cebu (UC) kay matud sa mayor usa si Go nga tag-iya sa Cebu Eastern College kang kansang building diha sa D. Jakosalem wala na gamita isip tunghaan.

Miingon si Rama nga ang Supreme Court andam mobayad sa abangan sa building nga gamiton isip temporary courts aron dili kaayo maparalisar ang daghang mga kaso sa RTC ug sa Municipal Trial Court in Cities.

Matud sa mayor nga magpaabot pa siya sa feedback gikan ni Go kon mahimo ba nga magamit isip temporary courts ang maong building sa CEC nga wala na gamita.

Sa laing bahin, gawas sa hukmanan, ang mga sakop sa Regional State Prosecutors (RSP) nga ania magbasi sa Sugbo nagpangita usab og ilang magamit isip opisina.

Si RSP Fernando Gubalane ug mga kauban miduaw gani sa usa ka hotel sa Pier-1 kon mahimo ba nila kini nga maukopahan.