P5 Milyones Gidunol sa SM alang sa Dakbayan

Si Mayor Michael Rama nakakita dayon og unang magpapatigayon nga mihatag og tabang-salapi aron magamit sa pagpatukod og bag-ong ospital sa dakbayan nga ipuli sa Cebu City Medical Center (CCMC) nga iyang ipaguba.

Ang SM Prime Holdings Inc. pinaagi sa iyang presidente nga si Hans T. Sy personal nga mitunol ngadto ni Mayor Rama sa tseke nga nagkantidad og P5 milyones.

Matud ni Sy nga naguol kaayo siya nga ang Sugbo nakasinati og kadaut tungod sa pag-igo sa linog. Gawas sa salapi nga gihatag ni Sy ngadto sa dakbayan, susama usab nga kantidad ang gihatag sa SM ngadto sa probinsya sa Sugbo.

Si Sy mismo mao usab ang mitunol niini ngadto ni Cebu Gov. Hilario Davide III.

“We at SM Prime Holdings, Inc. are deeply saddened by the devastation caused to parts of the Cebu City by the earthquake which hit the Visayas on October 15. As a sign of solidarity with the people of Cebu City, we wish to provide financial assistance to the city,” matud ni Sy sa iyang suwat sa mayor.

Bisan og wala itataw ni Sy nga ang kwarta alang kini sa pagtukod sa bag-ong ospital, apan si Mayor Rama nagkanayon nga himoon niya kini nga “kati-an” aron ang ubang mga magpapatigayon mohatag usab og susama nga tabang sama sa gihimo ni Sy.

Matud ni City Treasurer Diwa Cuevas nga mag-open sila og bag-ong account og ibutang nila sa trust fund ang mga salapi nga madawat para sa pagtukod og bag-ong ospital.

Gipakigtagboan usab kagahapon ni Mayor Rama ang mga representante sa lainlaing pribadong ospital aron pasabton sila sa panginahanglan nga sila modawat sa mga pasyente nga i-refer kanila gikan sa kagamhanan sa dakbayan.

Samtang Ang kadagkoan sa Bureau of Fire Protection (BFP) sa Manila supak nga papahawaon ang mga bombero gikan sa ilang building diha sa Natalio Bacalso Avenue.

Kini maoy gibutyag ni Senior Superintendent Esmael Codilla, ang acting Regional Fire Marshall sa Bureau of Fire Protection dinhi sa Central Visayas.

Ang pagpapahawa sa kabomberohan gikan sa building nga ila karong nahimutangan nagumikan kay buot ni Mayor Rama nga ang building diha sa Natalio Bacalso Avenue nga gigamit karon sa kabomberohan gamiton nga “temporary hospital.”

Ang mga structural ug civil engineer mihulagway nga ang building sa Cebu City Medical Center (CCMC) dili na luwas nga estahan og mga pasyente human sa linog niadtong Oktobre 15.

Human masayud sa pagsupak sa mga opisyal sa BJMP sa tinguha nga papahawaon ang mga bombero sa ila karong nahimutangan, si mayor Michael Rama dali nga nakigtagbo sa mga bombero kagahapon sa hapon.

Gipasabot sa mayor ang mga bombero nga wala siya maghuna-huna nga dili na pabalikon sa ilang opisina ang mga bombero.

Ang mga bombero giingnan sa mayor nga angayan sila nga mosakripisyo tungod og alang sa mga masakiton nga magpatambal apan dili na makagamit sa building sa duol nga CCMC.

Miinsistir si Rama nga isip mayor siya maoy magbuot ilabi niining panahon sa emergensya.