Osmeña Mikyestyon sa mga Official Ballots

Gikwestyon ni kanhi Kongresista Tomas Osmeña kon ngano nga ang mga official ballots gikan sa 25 ka clustered precincts dinhi sa dakbayan wala man gisulod sa ballot boxes ug didto ra gitipigan sa opisina sa Comelec sulod sa tulo ka buwan.

Matud ni Osmeña nga apil sa maong mga balota ilang giprotestahan ug gitinguha nga iphon pag-usab sa Comelec tungod kay nagduda sila nga dili tinuod nga napilde sila sa mga presento.

Nahibaw-an nga si Osmeña ug kanhi Vice Mayor Joy Augustus Young miprotesta sa kadaugan nila ni Mayor Michael Rama ug Vice Mayor Edgardo Labella ug ang election protest gitagad na karon sa Comelec First Division didto sa Manila.

Dihang gisukna si Osmeña kon unsa’y posible nga dangatan sa ilang election protest kon mahitabo nga nabinuangan ang maong mga official ballots, wala kaayo ganahi mohatag og tubag si Osmeña.

Si Osmeña nakadawat og suwat gikan nila ni Election Officers Marchel Sarno ug Edwin Cadungog kaniadto lang Septiembre 3 nga ang mga “scanned official ballots” gikan sa 25 ka clustered precincts nga gigamit sa miaging eleksyon ibalhin ngadto sa city treasurer’s office.

Matud sa duha ka election officers nga ang maong mga official ballots nasayop nga didto madala sa ilang opisina imbis adto unta sa city treasurer’s office.

Gikwestyon kini ni Osmeña kon ngano nga gikan sa Mayo kaniadto na man lang Septiembre 3 gitugyan sa Comelec ngadto sa City Treasurer’s Office ang maong mga balota.

Si Sarno mipasabot nga dili siya maoy election officer dinhi sa dakbayan sa Sugbo sa miaging eleksyon, apan mitug-an siya nga sayop ang mga maestra nga nagsilbi nga Board of Election Inspectors.

Imbis isulod sa ballot boxes ang maong mga official ballots, gikandadohan sa mga maestra ang ballot box nga wala isulod ang balota ug duna sa’y maestra nga miapil sa pagsulod sa Precinct Count Optical Scan (PCOS) machine sa ballot box.

Sanglit ang ballot box dili na man mabuksan pag-usab gawas kon may pagtugot sa Comelec-Manila, ang mga balota didto na lang gibutang sa Comelec-Cebu City office.