Foundation Alang kang Don Sergio Osmeña Sr., Giplanohan

Ang usa sa mga great grandson kon “apo sa tuhod” ni Don Sergio Osmeña Sr. misugyot nga maayong magmugna og foundation ang mga suod nga kabanay ug kahigalaan sa kanhi presidente sa nasud.

Si Jose Antonio “Jojo” Osmeña mipahibalo niini dihang mihimo siya og “response” sa ngalan sa banay’ng Osmeña kabahin sa pagpasidungog sa iyang apohan nga wala gayud makahimo’g buling sa iyang serbisyo.

Gihulagway ni Jojo Osmeña nga ang iyang apohan dali ra kaayo handumon pinaagi sa tulo ka “S” nga mao ang selflessness, simplicity ug service-oriented.

Matud sa batan-ong Osmeña nga ang iyang apohan sayon ra unta kaayo maadunahan kon mihimo pa kini og pagpangawkaw sakwarta sa kagamhanan apan wala kini himoa ni Don Sergio.

Gisaulog niadtong miaging Lunes ang ika-135 ka tuig nga sumad sa pagkahimugso ni Don Sergio diha sa dapit nga iyang natawhan sa eskena Osmeña Boulevard ug Lapulapu Street.

Malaumon si Jojo Osmeña nga ang mga mithi ni Don Sergio sundon g’yud unta sa mga opisyal ug bisan sa mga yano nga kawani sa kagamhanan.

Sa iyang bahin, si Vice Mayor Edgardo Labella midason sa pamahayag sa apo ni Don Sergio pinaagi sa pag-ingon nga ang kanhi political kingpin sa Sugbo angay gayud nga yugboan sa katawhan.

Si kanhi Kongresista Tomas Osmeña miingon nga dili maayo tan-awon nga siya ang mangunay sa pagpangulo aron mamugna ang usa ka foundation nga gisugyot sa apo ni Don Sergio.