Rama Gidayeg Si Napoles Sa Pag Surrender; Gipangita Si Badana

Gidayeg ni Cebu City Mayor Michael Rama ang ka-isog ni businesswoman Janet Lim-Napoles sa iyang pagtugyan sa iyang kaugalingon ngadto kang Presidente Noynoy Aquino sa Miyerkules sa gabii ngadto sa Malacañang.

Matud pa sa mayor nga ang maong panghitabo usa ka maayong kalambuan sa nasod aron matubag na ang mga anomaliya sa ‘pork barrel’ scam uban usab sa mga opisyal nga gikatahong nagpaluyo niini.

Si Napoles ang labing wanted sa nasod human kini nalambigit sa ‘pork barrel’ scam nga nakapadasig sa bag-o lang nga indignation rally nga gitawag og ‘million people march’ niadtong Lunes. Nagkahiusa ang minilyon ka Pilipino sa pagpakita sa ilang pagsupak ug pagkadismaya sa mga kahiwiang buhat sa pipila ka mga opisyal sa nasod bahin sa ilang Priority Development Assistance Fund kon PDAF o Pork Barrel.

Apan gitandi usab sa mayor ang disisyon ni Napoles batok kang Rosalina Badana, kanhi pagador sa Cebu City Hall, kinsa wala misurender sa awtoridad kabahin sa mga kahiwian nga iyang nabuhat sulod sa dakbayan sa Sugbu.

Base sa mga taho, si Badana nagsilbing paymaster sa Treasurer’s Office kinsa giingon’g nakadispalko og minilyon nga gahin sa pangamhanan sulod sa tuig 1995 hangtud 1998, ug wa pa gihapon makit-i sa pagkakaron.

Awhag usab ni Mayor Rama ngadto kang Badana nga mo-surender na sa labi’ng dali’ng panahon alang sa pagpatin-aw sa iyang kalapasang nabuhat og pagbalik sa P18.5 milyones sa dakbayan sa Sugbu. (Gessa Gunhuran, PIO Staff)