Mga Piniriso Nagpa-Upaw Tungod sa “Oil Spill’

Mga duha ka libo ka piniriso sa Cebu Provincial Detention and Rehabilitation Center ug sa Lapulapu City Jail gikataho nga nagpa-upaw aron idonar ang ilang mga bohok nga gamiton nga pang-akontra nga dili mokatap ang “oil spill” sa kabaybayonan sa Sugbo.

Ang kadagkoan sa Kapitolyo motabang aron mapadali ang pag-upaw sa gatusan ka binilanggo nga natandog sa kahimtang sa mga tawo nga nagpuyo sa Cordova nga apektado ang ilang panginabuhian tungod sa pagkuyanap sa oil gikan sa nalunod nga barko.

Hangtud karon wala gayud kapugngi ang padayon nga paggawas sa oil gikan sa nalunod nga barko nga nagkarga og 120,000 litros nga Bunker Crude Oil samtang ang makina sa M/V St. Thomas Aquinas adunay oil nga mga 20,000 litros.

Gireport sa kadagkoan sa Department of Environment and Natural Resources (DENR) nga ang tanang 12 ka coastal barangay sa Cordova, ingon man ang Kalawisan ug Canjulao sa Lapulapu City, apektado na sa oil spill.

Ang mga binilanggo nakasabot sa panginahanglan nga makatigum ang kagamhanan og daghang buhok nga magamit isip artificial oil spill boom aron mapugngan ang pagkuyanap niini ngadto sa kabaybayonan.

Gipaabot nga sinako nga mga buhok ang matigum kon sa mga binilanggo nga nakahukom nga silang tanan magpauwaw aron pagpreserbar sa kalihukan.

Ang mga tinanom nga bakhaw sa lapad nga honasan sa Cordova nangamatay na ug ang mga kinhason mikirig na human makasimhot og oil gikan sa barko. Gikabalak-an karon nga ang tinubdan sa tubig maapektahan usab niining oil spill.

Matud ni DENR Regional Executive Director Isabelo Montejo nga wala pa sila makakuha og report gikan sa mga water sampling nga ilang gihimo.