Rama Nag ‘Occular Inspection’ sa Dalan MJ Cuenco

Alang sa planong ‘Road Wideninig’ kon pagpalapad sa dalan, gibisita ni Mayor Michael Lopez Rama uban sa mga representante sa Department of Public Works and Highways kon DPWH, ug pipila ka mga kawani sa dakbayan ang dalan M.J. Cuenco ning syudad sa niadtong Agosto 15, 2013.

Gipahigayon ang ‘Ocular inspection’ human sa panagtigom didto sa buhatan sa Mayor uban silang Engr. Rachel Lumapas sa DPWH Rehiyon 7; Engr. Lito Catubig sa DPWH Cebu City District Engineering Office kon CCDEO; Atty. Brando Ray Raya, ang hepe sa Legal Office sa DPWH Rehiyon 7; Engr. Joel Riston sa Cebu City Department of Engineering and Public Works kon DEPW; Atty. Jerone Castillo, ang hepe sa Cebu City Legal Office; ug Jonathan Tumulak, ang Operations head sa Cebu City Traffic Operations Management kon CITOM.

Nakita sa grupo ang pipila ka mga edipisyo ug panimalay nga nakalapas na gyod sa gitaganang 3-meter easement gikan sa kalsada, hilabina ang dapit sa Barangay Hall sa Barangay Mabolo.

Kahinumduman nga niadtong Agosto 2, 2012 halos kapin sa usa ka tuig na ang milabay, personal usab nga gibisita sa Mayor ang dalan MJ Cuenco gikan sa Imus Road paingon sa Simbahan sa Mabolo. Nasuta sa maong inspection nga 4 lamang sa 16 ka mga panimalay ang lihitimong ‘Ancestral Heritage House’. Kini gipanag-iya sa kaliwat nilang Amparo Urot-Rubi sa Barangay Carreta, Juanita Chui sa Barangay Hipodromo, ug Nersas Macasero ug Ashly Bacalla parehong anaa sa Barangay Mabolo.

Samtang mokabat ug Php16,000.00 matag metro kwadrado ang kantidad sa mga luna nga mabayaran sa Kauluhan nga Kagamhanan pinaagi sa DPWH alang sa gitawag nga “Just Compensation.”

Kahinumduman usab nga gitigom sa Mayor ang mga apektadong pamilya alang sa pagpalapad sa maong dalan alang sa usa ka konsultasyon didto sa Sinulog Hall niadtong Hulyo 30 sa milabayng tuig.

Sa pagsuwat ning balita, padayon pang giplantsa  sa dakbayan ug DPWH  ang pagsulbad sa mga legal nga isyu ug uban pang gikinahanglang lakang alang sa katumanan sa dul-an usa ka kilometro nga “Road widening project” sa dalan MJ Cuenco. (Ni: Greggy Jiggs P. Senados, PIO Staff)