Rama Mipadayun sa Pagpasabot sa Iyang Plano

Human sa iyang usa ka semana nga official trip didto sa Japan, gipadayon ni Cebu City Mayor Michael Rama ang komprehensibong pagpasabot sa iyang mga plano ug tinguha alang sa iyang ikaduhang termino.

Sa milabay nga Agosto 7, 2013, Miyerkules, gipresentar sa Mayor ngadto sa 167 ka mga katawhan gikan sa pribadong sektor ug mga Presidente sa Senior Citizen’s Organizations gikan sa 80 ka barangay ning syudad ang iyang malungtarong panglantaw ug misyon alang sa mga Sugbuanon ug sa dakbayan sa Sugbo, ang direksyon ug tamdanan sa kalambuan, lakip na ang iyang plataporma de gobiyerno ug mga maayong mga plano alang sa usa ka people-privately driven governance.

Matod pa sa Mayor nga “dili kita makaabot sa atong tumong kung dili ta magpakabana”. Dugang pa niini nga, “While we are still here kicking and alive, atong paningkamotan ang paglantaw sa nindot nga kaugmaon, kay kung dili kita, kinsa man? kung dili karon, kanus-a pa man?”

Samtang giawhag usab sa Amahan sa syudad ang tanan diha sa pagtabang sa mga nagkadaiyang programa ug proyekto sa dakbayan apil na usab ang pagtul-id sa hiwi, pagnindot sa bati, paglimpiyo sa hugaw, pagwagtang sa baho, ug paghan-ay sa gubot.

Dugang gipadayag sa Mayor nga gikinahanglang magtinabangay ang tanan alang sa kaayohan ug kalambuan sa syudad subay sa adbokasiya nga mao ang Barangayan, Bayanihan ug Boluntarismo, ug ang pagbaton sa MOKADA kon Master One, Know All and Do All.

Migahin gyod ang Mayor ug oras diha sa pagpasabot sa iyang tiunay nga pagpanglagad, nga limpyo ug tinarong nga panggobiyerno alang sa usa ka malungtarong katilingban ug malambuong syudad sa Sugbo.

Samtang matod pa ni Mr. Jose Ore, 73 ang edad ug mao ang Presidente sa Senior Citizens Organization sa Barangay Lorega San Miguel nga, “Maayo gyod ni ang gibuhat sa Mayor kay karon kahibalo na ta kung asa ta padulong, dili na ta masaag.”

Dugang gipadayag ni Ore nga, “I have nothing to add, basta matuman lang ang tanan ok ra, because I can say that the Mayor is serious and transparent,” sa dihang gikahinabi sa mga reporter. (Ni: Greggy Jiggs P. Senados, PIO Staff)