Local Jobs Fair sa Brgy. Pahina Central Ugmang Adlawa

Aron sa paghatag og kahigayonan sa mga katawhang Sugbuanon nga nangita ug trabaho, ipahigayon sa kagamhanan sa dakbayan sa Sugbo, pinaagi sa Department of Manpower Development and Placement kon DMDP ang Local Jobs Fair karong Sabado, Agosto 10, 2013, ngadto sa Barangay Pahina Central Sports Complex ning syudad.

Gihingusgan nga mapatuman ang matag Sabado nga Local Jobs-fair sa dakbayan aron malukop ug matabangan ang mga nangitag trabaho sa 80 ka barangay niini.

Kahinumduman nga ang giilang ‘Father of Cebu City Jobs Fair’ mao si Mayor Michael Lopez Rama kinsa misugod sa pagpahigayon sa maong mapuslanong kalihokan niadtong Konsehal pa ang Mayor.

Daghan nang mga katawhan ang natabangan nga nakatrabaho pinaagi sa Local ug Overseas Jobs Fair sa kagamhanan sa dakbayan sa Sugbo.

Ang kalihokan nga magsugod sa alas-8 sa buntag hangtod sa alas-5 sa hapon adunay 25 ka mga ahensiya ug kompanya nga mosalmot. Kini naglangkob sa SM Supermarket, Cebu Mitsumi Incorporated, Force Manpower, Montrade Manpower and General Services, SM Hypermarket, Gaisano Grand Group of Companies, Romeo Austria Trading, Quick Manpower, Cebu General Services, Cebu Workactive Manpower Services, Aegis People Support, Metro Gaisano, PhilAm Life, Taking You Forward Incorporated, Kudo Support, Central Lumber Corporation, Taytay sa Kauswagan, HR Smart, Arm Resources, Asiapro Cooperative, Support Save Solutions Incorporated, Orient Express, Able Services Incorporated, Sugureta ug Euro P2P Forbeslux International.

Giawhag ang tanan nga nangita’g trabaho ilabina ang mga ‘Fresh graduates’ ug mga ‘Unemployed’ sa pagsalmot sa maong higayon nga maghatag ug oportunidad nga makatrabaho. Giawhag usab sila sa pagdala sa ilang updated nga Resume/Biodata, Transcript of Records sa College graduate, High School Diploma, ug Employment Certification kung anaa.

Alang usab sa dugang nga kasayuran mamahimong mobisita sa opisina sa DMDP nga anaa sa 2nd Floor sa Ramos Public Market building, sa dalan F. Ramos ning syudad o mamahimong motawag sa Tel. No. 253 – 9212.

Kahinumduman nga sa milabayng mga buwan Hulyo 6, 2013 ang Local Jobs Fair sa dakbayan gipahigayon didto sa Barangay Hipodromo diin sa 51 ka mga aplikante, 10 niini ang na ‘Hired on the spot’ kon HOTS; Hulyo 13 sa Barangay Kalunasan mikabat ug 62 ang mga aplikante ug 17 HOTS; Hulyo 20 sa Barangay Talamban diin 31 ang HOTS sa 142 ka mga aplikante; Hulyo 27 sa Barangay Mambaling nga adunay 128 ka mga aplikante ug 13 ang HOTS; ug niadtong Agosto 3 didto sa Barangay Capitol Site diin sa 197 ka mga aplikante, 72 ang HOTS. (Ni: Greggy Jiggs P. Senados, PIO staff)