‘Hotline 117’ Hingpit nang Mapatuman

Hingpit nang nauyonan sa Police Coordinating and Advisory Council (PCAC) ang pagtinir o pagamit sa “117” isip maoy opisyal nga 3-digit hotline number nga matawagan sa katawhan kun adunay hulga sa krimen ug emerhensiya.

Kini human mipakanaug og resolusyon ang PCAC sa ilang katapusang tigom sulod sa unang termino ni Mayor Mike Rama nga nagduso og rekommendasyon sa mayor pagpatuman sa mamahimong tawagon nga Cebu City Public Safety Hotline.

Gibutyag ni Eugene Elizalde, tsirman sa PCAC nga gilaumang masugdan ang proyekto sa unang buwan sa ikaduhang termino sa mayor og human mipadayag pagsuporta ang mga telcos nga moabag niini uban usab ang director sa NTC-7 nga si Jess Laureno.

Kahinumduman nga mikumiter sa plano ang mga kadagkuan sa telcos nga sila si Bong Lintag sa PLDT, Bennex Katigbak sa Smart, Atty. Manuel Gordon ug Jerry Yntig; sa Globe nga andam silang mopaluyo sa proyekto ug mohatag og technical nga ayuda.

Mopadangat og pormal nga suwat ang PCAC ngadto sa maong mga opisyal sa telcos arun hangyuon nga moabag sa technical preparation ug pagdonar og mga PABX unit nga kinahanglanon sa Call Center niini nga mahiusa unya sa Crisis Command Center.

Matud ni pa Elizalde nga pwedeng matawagan ang maong hotline number og cellphone users ug landline panahon sa krimen, emerhensiya ug kalamidad nga dali dayong mapasa sa mga hintundang ahensiya alang sa pagresponde susama sa 911 sa America.

Kahinumduman nga bag-ohay lang nasugdan pagtukod ang Command Center alang sa 30 ka mga CCTV cameras nga namuntar diha sa mga kadalanan nga magamit sa pag-monitor sa dagan sa kahapsay ug kalinaw sa dakbayan.

Tuyo kining gimugna ni Mayor Rama human sa kaguliyang nga nasinati sa “tsunami scare” nga nakahatag og dakong kalisang sa mga sugbuanon niadtong Pebrero sa miaging tuig human mitay-og ang kusog nga linog didto sa Negros Oriental. (Eli Espina – PIO Staff)