Romana, Bag-ong Hepe sa CCPO

Napili na ang bag-ong hepe sa Cebu City Police Office kon CCPO nga mao si Senior Superintendent Noli Romana.

Si Romana mao ang kanhi direktor sa Negros Oriental Provincial Office ug maoy mohulip kang Senior Superintendent Mariano Natuel Jr. kinsa nagsugod pagka-hepe sa CCPO niadtong Enero 1 ning tuiga.

Ang memorandum sa pagkapili ni Romana nadawat sa Police Regional Office 7 Martes, Hulyo 29, 2013 nga gipirmahan ni Director Catalino Cuy, ang Directorate for Personnel and Records Management sa Philippine National Police kon PNP.

Kahinumduman nga gikasaugmuyo ni Mayor Michael Rama ang hinanaling pagtangtang kang Senior Supt. Melvin Ramon Buenafe isip hepe sa CCPO bisan pa man ug aduna pay dakong kalihokan sa syudad nga mao ang Sinulog 2013.

Ang kadagkuan sa PNP igo lamang unta nga maghatag og listahan ngadto kang Mayor Rama sa mga nominadong opisyal aron sa pagtudlo niini isip mamahimong hepe sa CCPO.

Personal mismo nga gibisita ni Mayor Rama ang Camp Crame sa milabayng semana kini aron sa pakighimamat kang PNP Chief Alan La Madrid Purisima og paghatag sa iyang rekomendasyon nga si  Romana maoy ihulip kang Natuel.

Sa iyang bahin, si Natuel nagkanayon, “Midawat lang ko sa order sa Camp Crame, kung pabor ka malipay ka ug dili ka pabor dili pod ka malipay. It’s for the Camp Crame to determine, also if God’s willing nga ma-stay ko it’s His will and I will accept it.” Dugang pa ni Natuel nga, “Ever since I never choose my assignment since 1995.”

Dugang pa, gikalipay sa Mayor kinsa tua karon sa Japan, ang pagkatudlo ni Romana isip bag-ong hepe sa CCPO. Kahinumduman nga kanunay gibalik-balik niini nga, “Give me my chief of police” pahinungod kang Presidente Benigno Simeon Coungco Aquino III, Department of Interior and Local Government (DILG) Sec. Manuel Roxas II ug kang Purisima.

Si Natuel ibalhin sa Cebu Provincial Police Office (CPPO) kini human sa pormal nga “Turn-over ceremony” nga pagahimoon sa buhatan sa CCPO karong Agosto 1, 2013, adlawng Huwebes sa alas 10 sa buntag.  Ang ”Tour of duty” sa mga hepe sa kapolisan mokabat lamang ug duha ka tuig og magdepende usab sa sitwasyon nga pwede malugwayan. (By: Greggy Jiggs P. Senados, PIO Staff)