‘Local Jobs Fair’ sa Brgy. Mambaling Karong Sabado

Aron sa paghatag og kahigayonan sa mga katawhang Sugbuanon nga nangita ug trabaho, ipahigayon sa kagamhanan sa dakbayan sa Sugbo, pinaagi sa Department of Manpower Development and Placement  (DMDP) ang usa ka Local Jobs Fair karong Sabado, Hulyo 27, 2013, ngadto sa Barangay Mambaling Sports Complex ning syudad.

Gihingusgan nga mapatuman ang matag Sabado nga Local Jobs-fair sa dakbayan aron malukop ug matabangan ang mga nangitag trabaho sa 80 ka barangay niini.

Ang giilang ‘Father of Cebu City Jobs Fair’ nga si Cebu City Mayor Michael Lopez Rama kinsa misugod sa pagpahigayon sa maong mapuslanong kalihokan sa kaniadtong Konsehal pa ang Mayor.

Daghan nang mga katawhan ang natabangan nga nakatrabaho pinaagi sa Local ug Overseas Jobs Fair sa kagamhanan sa dakbayan sa Sugbo.

Ang kalihokan nga magsugod sa alas-8 sa buntag hangtod sa alas-5 sa hapon adunay 24 ka mga ahensiya ug kompanya nga mosalmot. Kini naglangkob sa SM Supermarket, Quick Manpower, Central Lumber Corporation, Cebu Mitsumi Incorporated, South Central Hardware, Force Manpower, Montrade Manpower and General Services, Asia Pro Cooperative, Dranix Employees Multipurpose Cooperative, ANR Unlimited, Cebu Belmont Incorporated, SM Hypermarket, Aegis People Support, HR Smart, Triple E, Sugureta, Gaisano Grand Group of Companies, Romeo V. Austria Trading, Philippine Prudential Life, Customer Touch Resources, Kudo Support, Arm Resources, ug Dranix Distributors.

Giawhag ang tanan nga nangita’g trabaho ilabina ang mga ‘Fresh graduates’ ug mga ‘Unemployed’ sa pagsalmot sa maong higayon nga maghatag og oportunidad nga makatrabaho. Giawhag usab sila sa paggdala sa ilang updated nga Resume/Biodata, Transcript of Records sa College graduate, High School Diploma, ug Employment Certification kung anaa.

Alang usab sa dugang nga kasayuran mamahimong mobisita sa opisina sa DMDP nga anaa sa 2nd Floor sa Ramos Public Market building, sa dalan F. Ramos ning syudad o mamahimong motawag sa Tel. No. 253 – 9212.

Kahinumduman nga sa milabayng mga Sabado, Hulyo 6, 2013 ang Local Jobs Fair sa dakbayan gipahigayon didto sa Barangay Hipodromo diin sa 51 ka mga aplikante, 10 niini ang na ‘Hired on the spot’ kon HOTS; Hulyo 13 sa Barangay Kalunasan mikabat ug 62 ang mga aplikante ug 17 HOTS; ug niadtong Hulyo 20 sa Barangay Talamban diin 31 ang HOTS sa 142 ka mga aplikante. (Ni: Greggy Jiggs P. Senados, PIO staff)