Mga Hilit Nga Tunghaan Gihatagan og Computer Sets

Ang mga tinun-an sa Buot Integrated School sa Barangay Buot ug Tabunan Integrated School sa Barangay Tabunan, gihatagan og tag napulo ka bag-ong computer sets ug gipahimoan pa og air-conditioned nga computer rooms.

Si Cebu City Vice Mayor Edgardo Labella nalipay kaayo sa gihimo sa Juanito King Foundation nga girepresentahan sa maong Executive Director nga si Kenneth Raymund King nga nakahuna-huna pagtabang sa mga tinun-an.

Matud ni Labella nga ang mga tinun-an sa duha ka integrated school dugay ra kaayo nga nangandoy nga matudloan sila unsaon paggamit ang computer aron dili sila maignorante sa mao nga kahimanan.

Si Dra. Rhea Mar Angtud, ang superintendent sa mga publiko nga tunghaan dinhi sa dakbayan sa Sugbo, mipasabot nga ang “integrated school” nagpasabot nga ang mao nga tunghaan elementarya ug high school gidumala ra og usa ka principal.

Matud ni Labella nga nahinangop kaayo siya dihang gitug-anan ni King nga gawas sa Tabunan ug Buot, ang ilang foundation mohatag pa og laing mga computers sa ubang mga tunghaan.

Ang gihimo J King Foundation maoy agi og pagtuman sa ilang “social responsibility” nga pagtabang sa mga nanginahanglan. Gisugyot ni Labella ngadto kang King nga ang sunod nila nga tabangan mao ang mga tinun-an sa  Barangay Mabini ug Lusaran.

Gipasabot ni Labella nga ang mao nga mga barangay nahimutang sa hilit na kaayo nga dapit sa bukid og pipila ra sa mga lumulopyo ang adunay personal computers sa ilang kabalayan.

Gipasalig ni King nga ilang tan-awon ang sugyot ni Labella.