LLCPO: Legal Ang Maong Engkwentro

● Kapolisan sa Lapu-Lapu wala mahadlok kun modangop sa Commission on Human Rights (CHR) ang pamilya niadtong ilang napatay.

Gitataw sa kapolisan sa dakbayan sa Lapu-Lapu nga wala g’yud sila mahadlok kun modangop sa Commission on Human Rights (CHR) ang pamilya niadtong ilang napatay sa engkwentro niadtong milabayng adlaw.

Si Senior Inspector Rogelio Penida, hepe sa City Anti Drug Enforcement Special Operations Task Force (CADESOTF) sa Lapu-Lapu City Police Office (LLCPO), miingon nga legal ang ila’ng engkwentro batok sa mga gikatahong drug pushers.

Nakadawat og impormasyon ang mga polis nga ang kabanayan sa ilang napatay nga sila si Romeo Daleon, alyas Otik, 30, ug Marlon Amapatuan Yongco, 29, mangayo og tabang sa CHR.

Sila si Daleon ug Yongco napatay sa mga sakop ni Penida atol sa ilang pinusilay nga miangol usab ni PO3 Joseph Villamor nga maoy nagsilbi nga poseur buyer sa mao nga buy-bust operation.

Si Daleon maoy tumong unta sa mga polis nga dakpon atol sa buy-bust operation apan ang poseur buyer nga si PO3 Villamor nailhan sa mga drug pushers ug giunhan siya pagpusil og naigo sa tiyan.

Ang mga kauban ni PO3 Villamor gikataho nga abtik kaayo nga nangggawas sa ilang gitagoan og misukli pagpusil ngadto sa sulod sa kotse nga gisakyan sa mga suspetsadong drug pushers.

Matud ni Pineda nga gisubay nila ang tukma’ng lagda sa paghimo sa buy-bust operation ug nalakip na niini ang coordination nga ilang gihimo sa Philippine Drug Enfocement Agency (PDEA)-7.

Gipanghimakak ni Penida nga nasubrahan nila sa pagpamusil ang mga drug pushers. Gipasabot ni Penida nga mihunong sila sa pagpamusil diha’ng ilang nasiguro nga nahunong na ang mga buto sa armas gikan sa sulod.
Daghang mga kapsola sa kalibre 45 ug 9 milimeter nga pistola ang giingon nga nakuha gikan sa sulod sa sakyanan sa mga gikatahong drug pushers.

Usa sa mga suspetsado nasamdan og anaa karon sa ospital.