Kuarta Pirmado ni Digong Sunod Tuig na Maabot sa Sugbo

Sa Enero 2017 na maapod apod ang mga kuarta nga pirmado ni Presidente Rodrigo Roa Duterte alang sa Probinsya sa Sugbo.

Gipahibalo ni Atty. Leonides Sumbi, ang regional director sa Bangko Sentral ng Pilipinas (BSP) nga gitakda unta nga ipadala ngari sa Sugbo ang tag-as nga mga kantidad nga mga bag-ong salapi human dayon sa pasko, Disyembre 26.

Apan gideklarar ang maong adlaw nga holiday, busa walay tawo ang BSP aron sa paghatod niini sa tulo ka mga eroplano. Aduna napod mga schedule nga hatdan ang mga abyon sa mga musunod nga mga adlaw. Matod ni Sumbi, naabot na ang mga ubos nga denominasyon nga mga salapi apan dili gihapon kini igo nga iapod apod sa mga bangko sa tibuok probinsya.

Si Sumbi nagkanayon nga ang ubang mga probinsya og mga dakbayan nag apod apod na sa mga kuarta nga pinirmahan ni Duterte. Matod niya, daghan ang gaatang sa maong mga salapi sukwahe kini sa mga nangaging Presidente.

Mipahimangno usab si Sumbi nga hangtod karon na lang Huweber Disyembre 29 ang katapusang adlaw nga mapailisan sa mga bangko ang New Design Series (NDS) nga mga salapi. (fcc/PIA7-Cebu)