Libreng Buhis sa Balikbayan Boxes Sugod Disyembre 25

Maayong balita alang sa mga balikbayan ug overseas Filipino workers (OFWs) nga magpadala og mga balikbayan boxes karong panahon sa Pasko.

Kini human gilagdaan sa Bureau of Customs (BoC) ug Department of Finance (DOF) ang Customs Administrative Order (CAO) 05-2016, nga nitumbok kalabot sa consolidated shipment sa mga balikbayan boxes.

Sugod sa Disyembre 25 ning kasamtangang tuig, mahimong libre na sa buhis ang mga balikbayan boxes nga adunay sulod nga mga gamit nga nagkantidad og hangtud P150,000.

Matud pa ni Customs Commissioner Nicanor Faeldon, ang CAO 05-2016 magsilbing implementing rules and regulations sa Section 800 (g) sa Customs and Modernization and Tariff Act (CMTA) diin nahisulod ang balikbayan boxes sa mga OFWs.

Samtang gitin-aw usab ni Faeldon nga ang mga balikbayan boxes nga dili mo-agi sa consolidated shipments dili apil sa CAO 05-2016. Ubos sa CMTA, ang mga QFWA angay adunay valid passports nga gi-isyu sa Department of Foreign Affairs (DFA) ug gisirtipikahan sa Department of Labor and Employment (DOLE) o Philippine Overseas Employment Administration (POEA).

Apil na usab ang mga non-resident Filipinos nga permanente nang residente sa ubang nasod apan nagpabiling Filipino citizens. Nanawagan ang BoC sa tanang international ug local forwarders, foreign consolidators ug local deconsolidators nga ipatuman ang sumbanan sa CAO. (ecb/PIA7-Bohol)