8888 Nat’l Hotline Number, Magamit na Sugod Agosto 1

Nagpagawas na kagahapon og kamanduan ang National Telecommunications Commission (NTC) nga nagbutang sa numerong “8888” isip opisyal nga National Complaint Hotline number.

Epektibo ang maong direktiba sugod karong Agosto 1, 2016.

Matud pa sa NTC, gihimo nila kining lakang isip pagtamod sa gusto ni Presidente Rodrigo Duterte nga magbaton og national citizens complaint hotline.

Sa wala pa nasapinal ang maong konsepto, nagpulong una ang mga stakeholders nga gipangunahan ni Deputy Cabinet Secretary Dale Cabrera.

Sa pagpatuman sa maong hotline number, obligado ang mga public telecommunications company nga i-connect ang mga tawag sa “8888” sa linya sa Civil Service Commission (CSC) ug Presidential Action Citizens Complaint Center.

Ang 8888 ang magsilbing sumbunganan sa publiko sa mga badlongon nga mga kawani ug opisyal sa gobyerno.

Giingong mahimo usab itawag sa maong numero ang mga wala naaksiyunan nga proyekto sa gobyerno apil na usab ang mga mi-abusar sa ilang posisyon. (ecb/PIA7-Bohol)