Mambalinganons Natabangan

Liboan ka mga residente sa Barangay Mambaling usa sa 80 ka barangay ning syudad ang natabangan sa libreng serbisyo sa kagamhanan ning dakbayan pinaagi sa programa ni Cebu City Mayor Michael Rama nga gitawag nga ‘City Hall At Your Doorstep’ kon ‘Piyesta sa Pagpangalagad’.

Sukad sa pagsugod sa programa niadtong tuig 2010, ang maong barangay ka-unom na nga gibisita sa programa alang sa paghatag ug libreng serbisyo gikan sa 22 ka mga departamento nga naglangkob sa Cebu City Government.

Sa pakighinabi sa BARUGG News kang Marilou Pacana, 38 ang edad, minyo ug adunay 4 ka anak usa lamang sa mga nakabenepisyo sa mga libreng serbisyo nga nagpa-check-up ug nagproseso sa birth certificate sa iyang anak, gipaambit niini nga, “Maayo gyod ang gihimo ni Mayor Rama nga natabangan ang mga katawhan pinaagi sa libreng serbisyo dinhi mismo sa among barangay. Pabor na kayo ni nga dili na mi makagasto ug plete u gang mga walay kwarta matabangan sa panglawas ug uban pang gikinahanglan.”

Samtang naglangkob sa mga gitanyag nga serbisyo sa 22 ka departamento sa Cebu City Hall mao ang konsultasyon sa rehistro sa pagkatawo, pagpakasal, ug pagkamatay; mass feeding ug timbang sa mga kabataan; medikal nga konsultasyon; pagpang-limpyo sa mga kanal ug drainage; pagpanaod ug pagpang-ayo sa mga street lights; pagrehistro, kapon ug bakuna sa mga iro ug iring; pagtanyag ug laboratory services sama sa blood typing ug blood sugar testing; pagpanghatag ug mga seedlings nga itanumay nga mga herbal, prutas ug utanon; ug paghatag ug nagkadaiyang mga tambal ug bitamina, ug uban pa.

Mipadangat usab sa ilang suporta ug presensya ang pipila ka mga opisyales ug kawani sa maong barangay atol sa paghatag sa mga libreng serbisyo ngadto sa ilang mga konstituwente.

Ang maong barangay adunay 35,791 ka mga residente nga nagpuyo sa 47 ka mga Sitio niini. Mokabat usab ug 20 ngadto sa 30 ka minutos ang pagbiyahe gikan sa Cebu City Hall paingon sa naasoyng barangay.

Dugang pa, ang kalihokan gipahigayon na matag adlawng Lunes ngadto sa Biyernes aron malukop ang 80 ka mga barangays nga naglangkob ning syudad kini diha sa paghatag ug serbisyo nga alang sa tanan. (Cebu City Public Information Office PIO/Greggy Jiggs P. Senados)