Mga Biktima sa Human Trafficking Midaghan sa Negros Oriental

May upat ka matang nga “human trafficking” sa Negros Oriental, sumala sa hepe sa Visayas Forum Romualdo “Dondee” Seneris kagahapong adlawa.

Matud pa ni Seneris nga kini mao ang domestic ug international nga pagpangrekurida sa mga kasambahay, o katabang sa panimalay, mga trabahante sa industriya sa tubo, konstruksyon ug deep sea fishing.

Gibutyag kini ni Seneris atol sa lakbit-saysay nga iyang gihimo kalabot sa Anti-Human Trafficking sa usa ka panagtagbo sa Association of Negros Oriental Public Information Officers (ANOPIO) didto sa buhatan sa PIA.

Miingon si Seneris nga dali kaayong mahaylo ang mga biktima ug ang ilang mga ginikanan gumikan sa nindot kaayong mga pasalig kanila nga hatagan sila og maayong trabaho didto sa gawas sa nasud dayon hatagan og pasiunang suhol ang mga ginikanan sa ilang mga biktimahonon.

Midugang si Seneris nga ang ‘Human Trafficking’ ikaduha na karon sa drug trafficking didto sa Negros Oriental.

Sumala pa ni Seneris nga ang mga babaye adto dad-a sa gagmay kaayo nga pabrika sa gawas, busa tungod sa kakuwang sa suweldo mosangko ngadto sa pagbaligya sa ilang lawas.

Samtang ang mga lalaki kinsa nalubong na daan sa utang pugson sa pagpatrabaho sa panguma o kaha sa panagat.

Gawas niini, si Seneris nagkanayon nga ang ubang matang sa trafficking nga nahitabo sa Negros Oriental mao ang pagpalusot og mga armas de fuego ug pakighilawas.

Ang “Climigration” na- popular usab kini sa mga dapit nga naagian og mga kalamidad diin ang mga apektado anaa sa lisud nga kahimtang busa dali kaayong mahaylo kun adunay motintal kanila og trabaho.

Gumikan niini, ang Visayan Forum kansang mga sakop anaa sa composite team sa Philippine Coast Guard (PCG), Department of Labor and Employment (DOLE), ug Philippine Ports Authority (PPA) nakasakop og upat ka tawo kinsa biktimahonon na unta sa mga illegal recruiter didto sa Negros Oriental, sumala pa ni Seneris.

Giawhag usab niya ang ubang mga ahensya sa kagamhanan nga mosuporta sa kampanya batok sa human trafficking didto sa maong lalawigan pinaagi sa pagtaho dayon niini ngadto kaniya kutob sa kadudahan nilang mga illegal recruiter.

Sa lalawigan sa Cebu, wala nay mailad sa mga illegal recruiter kay abtik kaayo ang mga Sugboanon, matud pa ni Seneris.