Rama Mitudlo na sa Bag-ong City Administrator

Usa ka doktor ang gitudlo ni Mayor Michael Rama nga bag-ong Cebu City administrator sugod niadtong Lunes.

Gitudlo ni Mayor Rama si Dr. Lucelle Mercado nga mohulip sa katungdanan ni Engr. Eugene Elizalde nga mihukom nga dili siya mopadayon paggunit sa maong pwesto.

Ang city administrator giisip sa uban nga “little mayor” mao nga matud ni Mayor Rama, kinahanglan nga ang tawo nga itudlo sa maong katungdanan iyang kasaligan.

Si Mercado asawa ni Rene Mercado, ang tsirman sa Metro Cebu Water District (MCWD) ug gig-agaw sa mayor. Gawas nga si Dr. Mercado city administrator, mopadayon siya pagpangulo sa City Anti-Indecency Board (CAIB).

Matud ni Elizalde nga nahukman niya nga biyaan ang pagka city administrator nga nagunitan lang niya bali’g tulo ka semana kay supak sa balaud nga magdawat siya’g duha ka sweldo sanglit sakop usab siya sa MCWD Board.

Mas gipalabi ni Elizalde ang pagka director sa MCWD nga magtigum lang kaduha sa usa ka buwan og dagku kaayo’g honorarium.

Gipasabot ni Elizalde nga di siya pwede motrabaho isip city administrator ug direktor sa MCWD kay gidili sa balaod ang “double compensation”.

Kahinumduman nga si Mayor Rama mipahigayon og “major revamp” sa iyang mga department heads niadtong Enero 2 diin si kanhi city administrator Jose Marie Poblete gipahulipan niya kang Elizalde.