Rama: Mga Kawaning Positibo sa Drugas, Taktakon

Giawhag g’yud ni Mayor Michael Rama ang mga opisyal sa kabarangayan nga taktakon ang ilang mga kawani nga mapositibo sa gidili nga matang sa drugas sama sa shabu.

Ang pamahayag ni Rama giluwatan human nga aduna na sa’y laing duha ka kawani sa barangay dinhi sa dakbayan nga namatud-an nga tiggamitan og gidili nga drugas.

Si Dr. Alice Utlang, hepe sa City Office for Substance Abuse Prevention (COSAP), miingon nga duha sa kapin sa 60 ka kawani sa Barangay Calamba nga ilang gi-drugtest napositibo sa paggamit og shabu.

Matud ni Rama nga dili g’yud maayo nga ang mga adik sa gidili’ng matang sa drugas hatagan og higayon nga makatrabaho sa kagamhanan kay posible nga makadani sila og uban nga mosalmot sa ilang bisyo.

Si Rama miingon nga gipataktak niya ang tanang kaswal nga kawani sa City Hall nga napositibo sa gipahigayong drugtest, apan ang mga regular gipailawom og imbestigasyon sa City Legal Office.

Wala dayon mahibaw-i sa METROCEBUNEWS kun ang kapitan sa Barangay Calamba nga si Yvonne Feleciano motuman ba sa awhag sa mayor. Si Feleciano maoy miawhag nga himoan og kinalit nga drugtest ang iyang mga kawani.

Ang Calamba apil sa mga barangay dinhi sa dakbayan nga giisip nga seriously-affected sa illegal nga drugas ug matud pa nga inpluwensyado nga mga tawo ang nagproteher sa negosyo diha sa maong dapit.

Si anti-drug crusader Alden Abi-Abi gipatay diha sa mao nga barangay tungod sa aktibo niya nga kampanya batok sa pagkuyanap sa ilegal nga drugas.