Probe, Gi-Reklamo

Ang mga konsehal sa dakbayan sa Sugbo miawhag sa usa ka grupo sa mga negosyante’ng Muslim nga ikiha ang mga sakop sa City Hall clearing team kun nagtoo g’yud sila nga miabuso kini sa ilang katungdanan.

Mao kini ang sugyot sa mga sakop sa Committee on Markets nga gipangulohan ni Konsehal Alvin Arcilla human kini mihimo og pagtoon sa reklamo ni Sultan Mama Miphantao.

Si Miphantao mipadala og suwat-reklamo ngadto sa City Hall human nga ang mga sakop sa Prevention, Restoration, Order, Beautification Enhancement (PROBE) mi-demolish sa ilang mga tindahan.

Ang PROBE nga gipangulohan ni Raquel Arce, miguba sa mga tindahan sa 12 ka sidewalk vendors nga naninda sa aseras sa dalan F. Escaño tungod kay gireklamo sila sa tag-iya sa usa ka hardware.

Si Mayor Michael Rama mihatag og pagtugot sa mga sakop sa PROBE nga panggub-on ang mga tindahan sa vendors nga wala gayud motahod sa pag-awhag kanila nga biyaan ang ilang nahimutangan.

Ang mga sakop ni Arce miguba sa mga tindahan sa nagpaugat nga mga vendors.

Sa ilang suwat-reklamo nga gipadala sa City Hall, si Miphantao mipasangil nga nahanaw ang usa ka brown envelope nga may sulod nga P60 mil, ang usa ka bag nga gisudlan og P5,000 ingon man tulo ka bulawan nga pulseras.

Ang mga sakop sa Committee on Markets mipatawag ni Arce apan ang opisyal sa PROBE ug sa samang higayon maoy market administrator miinsistir nga wala mangawat ang iyang mga sakop.

Matud ni Arce nga igo lang sila nga mituman sa kamandoan sa mayor nga hawanan ang aseras nga gireklamo sa tag-iya sa Cebu Bionic Builder Supply nga dili gusto nga adunay maninda atubangan sa ilang tindahan.

Si Konsehal Arcilla nagkanayon nga mahimong mopasaka og kaso sa hukmanan ang mga mireklamo nga tindera kun tinuod man g’yud nga nahanaw ang ilang salapi ug mga alahas atol sa pagpangguba sa ilang mga tindahan.